Pavlodarda alǵashqy elektrobýstar jolǵa shyqty
PAVLODAR. QazAqparat – Pavlodar qalasynda alǵashqy 10 elektrobýs jolaýshylardy tasymaldaı bastady, dep habarlaıdy QazAqparat pavlodarnews.kz saıtyna silteme jasap.
Avtobýtar № 10, № 21 jáne № 22 baǵdar boıynsha qatynaıdy.
«Elektrobýstar ekologııalyq taza kólik bolyp sanalady. Atmosferaǵa qaldyqtar taralmaıdy. Ekinshiden, dızeldik otynmen salystyrǵanda úsh-tórt ese únemdi: dızeldik otyn, maı, qozǵaltqyshqa qyzmet kórsetý qajet emes», - deıdi № 1 avtobýs parkiniń dırektory Ernar Qońyrhanov.
Elektrobýstar úlken syıymdylyǵy bar jáne tez qýattandyrylatyn lıtıı-tıtanatty akkýmýlıatorlarmen jabdyqtalǵan. Elektrobýs tolyq qýat alǵanda 70 shaqyrymǵa deıin jetedi.
Park dırektorynyń aıtýynsha, marshrýttardyń sońǵy aıaldamalarynda avtobýstardy 15 mınýtqa jýyq qýattaýǵa qoıatyn stantsııalar ornatylǵan. Qalada barlyǵy segiz stantsııa paıda boldy, taǵy eki stantsııa ornatý josparlanǵan.
№ 1 avtopark dırektory habarlaǵandaı, mundaı batareıalary bar elektrobýstar Qazaqstanda alǵash ret Pavlodarǵa jetkizildi. Osyǵan uqsas avtobýstar Aqtaýda da bar, onda olar bir jyl jumys istedi jáne qatal klımatqa eseptelgen.
«Batareıalar syıymdylyqty mınýs 40 gradýsqa deıin saqtaıdy. Avtoóndirýshimen jyl boıy elektrobýstar men dızeldi avtobýstardyń tehnıkalyq sıpattamalary, parametrleri pysyqtaldy. Zaýytpen kelisilip, avtobýstardy qosymsha jylý qazandyǵymen jabdyqtady. Qysta dızel otynyn jylytý úshin paıdalanady, biraq elektr qýatymen júretin bolady», – dep atap ótti Ernar Qońyrhanov.
Kóliktiń ishinde otyratyn – 29 jáne turyp turatyn 46 oryn bar. Múmkindigi shekteýli adamdar úshin kótergishter men shyntaqshalary bar oryndyqtar, sondaı-aq ıtterge arnalǵan arnaıy oryndar qarastyrylǵan.
Elektrobýstarǵa eki jyl nemese júz myń shaqyrym jol júrýge, qýattaý stantsııalary men batareıalarǵa bes jylǵa kepildik beriledi. Sońǵylaryn óndirýshi zaýyt aýystyrady jáne kádege jaratady. Kepildik kezeńiniń sońyna deıin avtoparkte óndirýshi zaýyttyń ınjeneri bolady. Esterińizge sala keteıik, avtoparkti 76% deıin jańartý «Báıterek» holdıngi men onyń enshiles kompanııalary – «QDB Lızıng» AQ, Qazaqstannyń Damý Banki arqyly júzege asyryldy.
30 avtobýs úshin lızıng somasy – 2 mlrd 800 myń teńge. Bir elektrobýs - 118 mln 200 myń teńge, dızeldi – 55 mln teńge, alǵashqysyna jarty jylda qyzmet kórsetýge - 2,5 mln teńge, ekinshisine – 8 mln teńge ketedi.
Ernar Qońyrhanov atap ótkendeı, qyzmet kórsetý qunynyń tómendiginen bir jyl paıdalanǵannan keıin park elektrobýstarda jol júrý tarıfin azaıtý múmkindigin qarastyrady. 10 elektrobýs jáne 20 dızeldi Pavlodarǵa 5 shilde kúni tanystyryldy. Dızeldi avtobýstar shildeniń sońynda, al elektrobýstar – 1 tamyzda jolǵa shyqty.
