Pavlodarda alǵash ret respýblıkalyq teatrlar festıvali ótedi

PAVLODAR. KAZINFORM - Bıyl Alash qaıratkeri, qazaqtyń kórnekti jazýshysy, dramatýrg, pýblıtsıst, qazaq ádebıetin qalyptastyrýshylardyń biri Júsipbek Aımaýytovtyń týǵanyna 135 jyl tolyp otyr. Tulǵanyń mereıtoıyna oraı Kerekýdegi Aımaýytov teatry «Ertis-Baıan» I respýblıkalyq teatrlar festıvalin ótkizbekshi.

Elimizdegi úzdik óner ujymdarynyń qoıylymdary baǵalanatyn teatrlar dodasy bıylǵy 20-25 qyrkúıek aralyǵyna josparlanǵan.

- Festıval otandyq teatr ónerindegi úzdik jumystardy, zamanaýı teatr úrdisiniń negizgi tendentsııalaryn anyqtaý jáne teatr óneriniń klassıkalyq, zamanaýı muralary arasyndaǵy shyǵarmashylyq baılanysty nyǵaıtý, akterlik kásibı deńgeıdi shyńdaý, teatr álemindegi jańa esimderdi anyqtaý maqsatynda ótkizgeli otyr. Uıymdastyrýshy –Pavlodar oblysy mádenıet, tilderdi damytý jáne arhıv isi basqarmasynyń J.Aımaýytov atyndaǵy qazaq mýzyka-drama teatry. Elimizdegi eń úzdik degen spekaklder Pavlodar tórinde qoıylyp, jergilikti kórermen de ózge akterlerdiń ónerine qaryq bolady degen oıdamyz. Bul festıvaldegi negizgi talap – qatysatyn jumystar buryn ózge teatrlardyń sahnasynda qoıylmaýy kerek ári sońǵy bir jyl ishinde premerasy ótken bolýy tıis. Bul bizdiń ózge áriptesterimizdiń arasyndaǵy básekelestikti arttyra túsedi dep senimdemiz Qazirdiń ózinde festıvalge qatysýǵa nıet bildirip jatqandar barshylyq. Tipti sonaý Italııadan habarlasyp, qatysý múmkindigin bilip jatqandar kezdesti, - deıdi J.Aımaýytov atyndaǵy Pavlodar oblystyq qazaq mýzyka-drama teatrynyń basshysy Arman Temirbek.

Qazirgi ýaqytta respýblıkalyq synǵa qatysý jóninde 7-8 teatrdan ótinim túsken. Al kúzde bul tizim 10-12-ge jetedi dep kútilip otyr. Aımaýytov teatrynyń ózi bıylǵy maýsymdy týar aıda qorytyndylap, bes jyldyq esep berý maqsatymen Almaty, Taldyqorǵan qalalaryna gastroldik issaparmen shyǵýdy josparlap qoıǵan.