Pavlodarda áleýmettik mańyzy bar azyq-túlik baǵasyn ósirgen sheneýnikter jazalandy

PAVLODAR. KAZINFORM - Pavlodar prokýratýrasy áleýmettik mańyzy bar azyq-túlik taýarlaryna baǵa belgileý barysyndaǵy zań buzýshylyqtardy anyqtady.

Prokýratýra qyzmetkerleri taldaý júrgizý barysynda áleýmettik mańyzy bar azyq-túlik taýarlary boıynsha bólshek saýda baǵalarynyń mınımaldy ruqsat etilgen shekti deńgeıleriniń kóterilý derekterin anyqtady.

- Óńirlik kásipkerlik basqarmasy baǵalardy esepteý kezinde kemshilikterge jol bergen. Onyń saldary shekti deńgeılerdiń edáýir ósýine alyp ákelgeni belgili boldy. Bul jaǵdaı kásipkerlerge áleýmettik mańyzy bar taýarlardy olardyń naqty qunynan edáýir joǵary baǵamen satýǵa múmkindik bergen. Atalǵan jaıt halyq úshin azyq-túlik ónimderiniń qoljetimdiligine teris áser etti,-dep habarlady óńirlik prokýratýradan.

Máselen, birinshi surypty unnyń shekti baǵasy 248 teńge dep belgilengen. Al atalǵan ónim ádettegi dúkenderde 152 teńgeden satylǵan. Buǵan qosa sıyr etiniń kılogramy 3196 teńge kórsetilgen. Alaıda Ulttyq statıstıka bıýrosynyń málimetinshe, bul ýaqytta Pavlodar oblysyndaǵy sıyr etiniń baǵasy 2479 teńgeni quraǵan.

Prokýratýra engizgen qadaǵalaý akti bıylǵy ekinshi toqsandaǵy shekti baǵalardy tómendetýdi qaıta qaraýǵa negiz bolǵan.

Al kemshilikke jol bergen jaýapty tulǵalar qatań tártiptik jaýapkershilikke tartylǵan.

Eske sala keteıik, Pavlodar oblysynda birlesken kásiporyndar metallýrgııa, hımııa, tamaq ónerkásibinde shoǵyrlanǵan.