Pavlodarda áleýmettik qyzmetkerler tıisti ruqsatsyz medıtsınalyq qyzmet kórsetken
Oblys prokýratýrasy jýyrda jumyspen qamtýdy úılestirý jáne áleýmettik baǵdarlamalar basqarmasy bıýdjet qarajaty esebinen zeınetkerlerge arnaýly áleýmettik qyzmetter kórsetý sapasyna taldaý júrgizdi.
Taldaý nátıjeleri boıynsha qoldanystaǵy zańnama normalaryn buza otyryp, kórsetiletin áleýmettik qyzmetter biryńǵaı talaptarǵa sáıkes kelmeıtini, onyń ishinde jetkizýshiler jekelegen qyzmetter kórsetpeıtini nemese olarmen aınalysýǵa ruqsaty joq ekeni, sondaı-aq azamattardyń qupııalylyq quqyqtary buzylǵany anyqtaldy.
Óz kezeginde, jumyspen qamtýdy úılestirý jáne áleýmettik baǵdarlamalar basqarmasy qyzmet kórsetýshiler tarapynan sharttyq mindettemelerdi oryndamaýdyń aıqyn buzýshylyqtaryn joıý jáne olardy kózdelgen jaýapkershilikke tartý boıynsha sharalar qabyldamaǵan. Bul rette sharttar boıynsha tólem tolyq kólemde júrgizilgen.
«Mysaly, aǵymdaǵy jyly 8 shildeden bastap áleýmettik qyzmetter kórsetý obektisindegi basseın jumys istemegen (sharttyń mindetti talaby bolyp tabylady). Nysan qaıta jańartýǵa jabylǵan (bul Jetkizýshiniń áleýmettik jelileriniń jarııalanymdarymen rastalady). Osyǵan qaramastan, basqarma buzýshylyqtardy joıýǵa jáne turaqsyzdyq aıyppulyn (aıyppul sanktsııalaryn) óndirip alýǵa baǵyttalǵan sharalar qabyldamaǵan», - delingen habarlamada.
Sondaı-aq «elicense.kz» málimetterin zerdeleý arqyly jetkizýshiniń medıtsınalyq qyzmettiń belgili bir túrlerine, onyń ishinde alǵashqy medıtsınalyq-sanıtarlyq kómekke, dárigerge deıingi kómekke, travmotologııa jáne ortopedııaǵa lıtsenzııasy bolmaǵany anyqtaldy.
Usynýdy qaraý nátıjeleri boıynsha áleýmettik qyzmet kórsetýshiler tıisti ruqsatsyz medıtsınalyq qyzmetpen aınalysqany úshin ákimshilik jaýapkershilikke tartyldy. Olarǵa qatysty narazylyq-talap aryz jumysy bastaldy. Basqarmanyń laýazymdy tulǵalary, sonyń ishinde basshylyǵy qatań jazaǵa tartylyp, anyqtalǵan buzýshylyqtardy joıý boıynsha sharalar qabyldandy.
