Pavlodarda áleýmettik bıýdjettik baǵdarlamalarǵa ózgerister engizildi
Atalǵan baǵdarlama turǵyndardyń áljýaz toptaryn áleýmettik kómek kórsetýge baǵyttalǵan. Qalalyq jumyspen qamtý jáne áleýmettik baǵdarlamalar bóliminiń basshysy Gúlbaram Bilálova qarajatty ıgerýdiń saraptamasyna súıenip, bıýdjettik baǵdarlamany túzetý jóninde usynys joldady.
«2018 jyly 11 is-shara boıynsha 306 mıllıon teńgeni quraıtyn qarajat qajettiligi belgilengen edi. Atalǵan qyzmet kórsetýdi alýshylardyń sany kemigenine baılanysty 11 mıllıon teńge únemdeldi», - dep jetkizdi Gúlbaram Bilálova.
Bólim basshysynyń sózine qaraǵanda, Uly Otan soǵysynyń ardagerleri jáne olarǵa teńestirilgen azamattar, múgedekter men aýyr keseldermen aýyratyn azamattar tizimderi 751 adamǵa azaıǵan. Qalalyq bilim berý uıymdarynyń oqýshylary men tárbıelenýshilerine qoǵamdyq kólikte jeńildikpen jol júrý túrindegi áleýmettik qoldaý jónindegi bıýdjettik baǵdarlamany qarjylandyrý qysqartylatyn boldy.
Bilim berý bólimi basshysynyń orynbasary Gúlmıra Álkenovanyń aqparatyna súıensek, 2018 jyly bul maqsatqa 3 568 000 teńge jumsaý josparlandy.
«Іs júzinde bıyl qalalyq bıýdjetten oqýshylardyń jol júrýine 2 169 000 teńge jumsaldy. - Jazǵy ýaqytta qalalyq bilim berý uıymdarynyń oqýshylary esebinen eńbek jasaqtarynyń sarbazdaryna 451 adamǵa 4800 teńgege kómek kórsetildi. Kómek alýshylardyń 290 adamǵa azaıýy sebepti 1 399 000 teńge únemdelip, qala bıýdjetine qaıtaryldy», - deıdi Gúlmıra Álkenova.
