Pavlodarda aldaǵy on jylda elektr qýaty óndirisi 60%-ǵa ósedi

PAVLODAR. KAZINFORM - Óńir qazirgi ýaqytta elimizdegi elektr energııasynyń 40%-dan astamyn qamtamasyz etip otyr. Elektr stansalarynyń jalpy qýaty – 8000 MVt.

Oblys ákiminiń baspasóz qyzmetinen habarlaǵandaı, Energetıka mınıstrligimen Ertis-Baıan óńirindegi elektr qýatynyń óndirisin 2035 jylǵa deıingi damytý jospary ázirlengen.

- Josparǵa sáıkes, Ekibastuzda №3 GRES qurylysyn salý, №2 GRES-te №3 jáne №4 energııa bloktaryn (árqaısysy 550 MVt) turǵyzý, Pavlodardaǵy №2 JEO-da qýaty 120 MVt bolatyn úsh birdeı týrbınany, Aqsý GRES-indegi №7 energııa blogyn jańartý óńirdegi elektr energııasy óndirisin aldaǵy jyldary 60 %-ǵa ulǵaıtady, - dep málimdedi ákimdikten.

Oblys taza energetıkaǵa da zeıin qoıyp otyr. Ekibastuz qalasyna jaqyn jerde aldaǵy jyldary jelden qýat alatyn elektr stansalary turǵyzylýy kerek. Qytaılyq kompanııa 500 MVt-tyq stansanyń alǵashqy kezeńin kelesi jyly aıaqtaıdy dep josparlanǵan.

Eske sala keteıik, elimizde elektr jáne jylý jelilerin dıagnostıkalaýǵa arnalǵan JI engizilip jatyr.