Pavlodarda akvapark qurylysyna baılanysty qalalyq baqtyń aýmaǵy qysqaryp qalǵan
PAVLODAR. KAZINFORM — Pavlodardaǵy qalalyq baqta bolashaq akvaparktiń avtoturaǵyna jer telimin bosatý úshin eki attraktsıon bólshekteldi.
Jergilikti turǵyndar qos attraktsıonnyń joq ekenin 2025 jyldyń qazan aıynda-aq baıqaǵan. Sol kezde «ıÝnga» jáne «Romashka» karýselderi bólshektelip, olardyń ornyna qorshaýlar ornatyla bastady. Turǵyndar buǵan narazylyq bildirgen edi. Biraq ákimdik bul sharanyń «profılaktıkalyq jumystardy júrgizý qajettiligine baılanysty» ýaqytsha ekenin resmı túrde málimdegen bolatyn. Sondaı-aq, bárin jóndep, kóktemge qaraı ornyna qoıatyndaryn ýáde etken.
— Oıyn jabdyqtaryn jańartýǵa bolar, biraq attraktsıondardy múldem alyp tastaýǵa bolmaıdy. Balalar munda oınap qana qoımaı, taza aýada demalady. Bul — qalalyq baqtyń jyldar boıy qoǵamǵa tıgizip otyrǵan paıdasy. Bizge ishi qapyryq, tynys alý qıyn bolatyn jabyq qoǵamdyq oryndardyń qajeti joq. Burynǵy karýselderdi qaldyrýǵa bolatynyna senimdi edik. Olar bárine unaıtyn, — deıdi Pavlodar qalasynyń turǵyny Mádına Betımova.
Alaıda bıyl kóktemde qorshaý alynǵan joq, al karýselderdi múldem basqa aýmaqqa ornata bastaǵan. Ol jer basqa attraktsıondarǵa óte jaqyn ornalasqan.
Qalalyq ákimdik jaǵdaıǵa qatysty túsinikteme berdi.
— Attraktsıondardy bólshekteý kórshiles ornalasqan akvaparktiń kópdeńgeıli parkıngin salý boıynsha qurylys jumystarynyń júrgizilýine baılanysty ýaqytsha júzege asyryldy. Buryn attraktsıondar ornalasqan jer telimi Pavlodar qalasy ákimdiginiń 2025 jylǵy 6 naýryzdaǵy № 344/1 qaýlysy negizinde «HAGI-Pavlodar» JShS-ne ýaqytsha paıdalanýǵa berilgen, — dep jaýap berdi jaýaptylar.
Sheneýnikterdiń aqparaty boıynsha, attraktsıondardy kóshirý jumystary atalǵan kompanııanyń qarajaty esebinen júrgizilip jatyr. Alaıda qalalyq baq qansha aýmaqtan aıyrylǵany týraly jaýapta aıtylmady.
Eske sala keteıik, Pavlodarda jer kezeginde 66 myńǵa jýyq adam tur.
