Pavlodarda aqparattyq qyzmetterdi negizsiz qymbattatqan laýazym ıeleri jazaǵa tartyldy

PAVLODAR. KAZINFORM - Óńirlik aqparat jáne qoǵamdyq damý basqarmasy materıaldardy ornalastyrýdyń qunyn negizsiz túrde kóterip, gazetterde - 3,5 ese, ınternet-resýrstarda - 7 ese, teledıdarda 16 ese qymbattatylǵan. Bul týraly Pavlodar oblysynyń prokýratýrasynan habarlady.

«QR Mádenıet jáne aqparat mınıstrligi buqaralyq aqparat quraldarynda memlekettik aqparattyq saıasatty júrgizý úshin satyp alynatyn qyzmetterdiń bazalyq baǵalaryn bekitti. Aqparattyq materıaldy gazetke ornalastyrý baǵasy (1 sharshy sm úshin) 400 teńgeni, ınternet-resýrstarda ornalastyrý úshin (1 tańba úshin) 38 teńgeni, teledıdarda bir mınýt ishinde 39 500 teńge mólsherin quraıdy. 
Bul rette oblystyń Aqparat jáne qoǵamdyq damý basqarmasy atalǵan qyzmetterdi negizsiz joǵary baǵamen satyp alyp otyrǵan. Mysaly, gazetterde ornalastyrǵan úshin quny - 3,5 ese (baǵasy 1447 teńge), ınternet-resýrstarda - 7 ese (270 teńge), teledıdarda 16 ese (633 862 teńge) qymbattatylǵan», - dep málimdedi prokýratýradan.

Prokýrorlyq den qoıý sharalarymen BAQ qyzmetteriniń bazalyq baǵasy qaıta qaraldy. Bıýdjet qarajaty 180 mln teńgege únemdelip, laýazymdy tulǵalar qatań tártiptik jazaǵa tartyldy.

Eske sala keteıik, Pavlodar prokýrorlary aýyzsý tarıfin zańsyz kótergen kásiporyndy jazalady.