Pavlodarda aqpan aıynda 16 azamat jekemenshik balabaqsha ashýǵa usynys bildirgen
ASTANA. QazAqparat - Pavlodar qalasynda 16 azamat memlekettik-jekeshelik áriptestik aıasynda balabaqsha ashyp, óz kásipterin júrgizýge nıet bildirip otyr, dep habarlaıdy pavlodarnews.kz .
Bul týraly Pavlodar qalalyq bilim berý bólimi mektepke deıingi mekemeler sektorynyń meńgerýshisi Baqyt Qyryqbesova málim etti. «Memlekettik-jekeshelik áriptestik aıasynda mektepke deıingi bilim berý mekemelerin ashý jumystary qyzý júrgizilýde. 16 kásipkerdiń biri - Pavlodar qalasynyń turǵyny Aınash Qudysheva. Ol 75 orynǵa arnalǵan balabaqsha ashyp, úıde otyrǵan jumyssyz áıelderdi eńbekpen qamtymaq. Qazirgi tańda osy jobaǵa yńǵaıly ǵımarat izdestirilýde. Ǵımarat tabylǵan soń bıznes jobasyn ázirlep, bankterden nesıe rásimdeý jumysyna kirisedi», - deıdi Baqyt Qyryqbesova.
Sonymen qatar, balabaqsha ashý úshin arnaıy ǵımarat salýdy josparlap júrgender de bar. Máselen, Pavlodar qalasynyń turǵyny Serik Isabekov esimdi azamat óziniń jeke úıin buzyp, ornyna 50 orynǵa arnalǵan balabaqsha salý jospary bar ekenin aıtqan. Eger, bıznesti damytý mekemeleri men ekinshi deńgeıli bankter bul jobaǵa qarjylaı qoldaý kórsetetin bolsa, jumysty kóp keshiktirmeı bastap ketpek.
«Jańa ǵımarat satyp alarda nemese salar kezde mektepke deıingi bilim berý mekemelerine qoıylatyn sharttar men sanıtarlyq-epıdemıologııalyq normalar talap etiledi. Máselen, ǵımarattyń keńdigi bir balaǵa eki sharshy metrden kem bolmaýy kerek. Osy sekildi zańdy normalardy saqtaýǵa shaqyramyz», - deıdi bólim basshysy.
Pavlodar qalalyq bilim berý bóliminiń deregine súıensek, qazirgi tańda oblys ortalyǵynda osyndaı jolmen alty balabaqsha jumys isteıdi. Olardyń tólemaqysy memlekettik mekemelermen salystyrǵanda eki esege qymbat. Dese de mektepke deıingi sábılerdi balabaqshamen qamtýǵa óz úlesterin qosyp otyr. Sonyń arqasynda Pavlodar qalasynda 3-6 jasqa deıingi sábıler 100 paıyz, al 1-6 jasqa deıingi búldirshinder 70 paıyz qamtylyp otyr.
