Pavlodarda aqpan aıynyń basy aıazdy bolady — Qazgıdromet

PAVLODAR. KAZINFORM — Aqpan aıynyń alǵashqy onkúndiginde túnde — 30 gradýsqa deıin aıaz turýy yqtımal. Aýa raıyn boljaýshylar aqpanda qar jıi jaýyp, aýyq-aýyq boran soǵatynyn eskertedi.

Qańtar aıynyń aıazdy kúnderi aqpanǵa ulasady degen boljam bar. «Qazgıdromet» RMK Pavlodar oblystyq fılıalynyń málimetinshe, aıdyń alǵashqy on kúninde túnde -25 -30 gradýsqa deıin, kúndiz -10 -15 gradýsqa deıin aıazdatady.

— Ekinshi onkúndikte termometr baǵanasy sál kóterilip, túnde -20, kúndiz -10 gradýs sýyq bolady. Al aıdyń sońyna taman túngi ýaqyttarda aıaz turyp, aýa temperatýrasy -28 gradýsqa deıin tómendeýi múmkin. Aı boıy aýa raıy qubylmaly bolady. Keıbir kúnderi temperatýra 0 gradýsqa deıin kóterilýi yqtımal, — dep habarlady «Qazgıdrometten».

Ylǵal kóp túsip, qarly borandar jıi soǵatyny da eskertilip otyr. Jeldiń ekpini keı kúnderi sekýndyna 15-20 metrge deıin jetýi múmkin.

Eske sala keteıik, ShQO-da aqpan aıazdy bolatynyn jazǵan edik.