Pavlodarda ákimdik qarjysyna jóndelgen úıler kógerip ketti

Sánııa Tetejanova 2022 jyldan beri Jetekshi aýylynda turady. Ol kópbalaly ana retinde jańa baspana alǵan. Biraq úıge kóship kirgennen beri úı aqaýdan kóz ashpaı keledi. Kórshilerimen birge qurylys aqaýlaryn anyqtaı bastady.

Turǵyndar jaǵdaıdy túzetýdi talap etip sheneýnikterge shaǵymdana berdi, biraq jaýap tek bıyl ǵana keldi.

Pavlodar qalasynyń ákimshiligi máselelerdi sheshýge qarajat tapty. Sánııa da kelisti, biraq sońynda jaǵdaı odan da nasharlady.

— Terezeler «jylaı» bastady. Jaı «jylamaıdy», quddy bir «zarlaıdy». Terezeni súrtip, shúberekti syqsańyz jarty shelek tolady. Kúnine eki ret súrtemiz, tańerteń jáne keshke, — dep shaǵymdandy Jetekshi aýylyndaǵy Mámetova kóshesindegi № 14/5 úıdiń turǵyny Sánııa Tetejanova.

Sánııanyń aıtýynsha, turǵyndar shatyrdaǵy shamamen 20 santımetr jylý oqshaýlaǵyshty alyp tastaǵandaryna da yzaly. Ornyna juqa oqshaýlaǵysh salynǵan. Biraq odan da qıyny, ylǵal men jeldetýdiń durys bolmaýyna baılanysty bólmelerdegi qabyrǵalardy zeń qaptap kógere bastady. Jetekshi aýylyndaǵy jańa úılerdiń kóbiniń turǵyndary osy máselege tap boldy.

Turǵyndardyń aıtýynsha, zeńdi juta berseń aýrý qylady. Pnevmonııa, al keıde odan da aýyr asqynýlarǵa ákep soqtyrýy múmkin.

— Meniń plevrıtim bar. Bul asqyný pnevmonııadan keıin paıda boldy, sebebi meniń úıim óte dymqyl, syz. Zeń joq, biraq syzdan kóresini kórip otyrmyz. Úıge kelip tósekke jatqyń da kelmeıdi, týra muzdaı sýǵa qulaǵandaı bolasyń, — deıdi Jetekshi aýylynyń Mámetova kóshesindegi № 14/6 úıdiń turǵyny Tilektes Muqasheva.

Pavlodar ákimdigi Jetekshi aýylyndaǵy Mámetova jáne Sátpaev kóshelerindegi ǵımarattar bıyl jóndeýden ótkenin rastady. Úıler birneshe jyl buryn salynyp, merdigerden satyp alynǵan. Kepildik merzimi aıaqtalǵandyqtan, aqaýlardy túzetý úshin bıýdjetten qarajat izdeýge týra kelgen. 

— Biz jeldetý júıesin ornattyq, biraq alǵashqy sýyq túsken soń, onyń biz kútkendeı nátıje bermeıtinin baıqadyq. Sondyqtan biz ony merdigermen birge qaıta jóndeýge sheshim qabyldadyq. Qazirgi bir kóshe tolyǵymen jóndeldi, nátıjeleri jaman emes. Turǵyndarmen áńgimelesý úshin apta saıyn sol jerge baramyn. Barlyǵynda meniń nómirim bar. Ózim baqylap otyrmyn. Keı úıler syzdan arylyp ta qaldy, basqalarda da jaǵdaı jaqsaryp keledi, — dedi Pavlodar qalalyq turǵyn úı bóliminiń basshysy Hamzat Baısenov.

Jalǵa beriletin 22 ǵımaratty jóndeýge bıýdjetten 175 mıllıon teńge jumsaldy. Sheneýnikter merdiger kompanııa qazirgi ýaqytta ylǵaldylyqty jáne sonyń saldarynan týyndaǵan zeńdi joıý úshin aýa ótkizgishterdi ornatyp jatqanyn aıtyp sendirdi. Olar basqa aqaýlardy túzetýge kómektesýge de daıyn.

Buǵan deıin Qyzylorda qalasyndaǵy apatty úı turǵyndary kóp jyldan beri úreı qushaǵynda kún keship kele jatqanyn aıtyp dabyl qaqqan bolatyn.