Pavlodarda ákimshilik sot tanysyn uryp-soqqan 7 boıjetkenge úkim shyǵardy
NUR-SULTAN. Qazaqparat – Pavlodarda bir top qyz kámelettik jasqa tolmaǵan tanysyn uryp ketken. Búgin Pavlodar qalasynyń mamandandyrylǵan ákimshilik sotynda tóbeleske qatysy bar 7 boıjetkenge qatysty úkim shyqty, dep habarlaıdy QazAqparat tilshisi.
28 aqpan kúni saǵat 19:00-de pablıkterdiń birinde Pavlodarda kámelettik jasqa tolmaǵan qyzdy bir top áıel qatigezdikpen uryp ketkeni týraly vıdeo jarııalanǵan bolatyn. Ol jerde tóbeleske qatysýshylar polıtsııa ustap alǵannan keıin de Instagram paraqshasyna ne istegenderi týraly vıdeo salǵandary jazylǵan. Vıdeodan olardyń tirek pýnktinde syra iship turǵandaryn kórýge bolady. Atalǵan fakt Pavlodar polıtsııasynyń soltústik bóliminde tirkelgen.
«28 sáýir kúni buryn tanys bolǵan qyzdar arasynda kelispeýshilik bolǵan. Tóbelestiń sebebi – zardap shekken qyz tanys qyzǵa sporttyq kıimin qaıtarmaı qoıǵan. Sondaı-aq, tirek pýnktinde alkogoldi ishimdik ishkeni úshin bes qyzǵa qatysty ákimshilik jaza qoldanylady. Olardyń bári 5 aılyq eseptik kórsetkish kóleminde aıyppul tóleıdi», - delingen baspasóz habarlamasynda.
Sondaı-aq, 3 mamyr kúni Pavlodar qalasyndaǵy mamandandyrylǵan ákimshilik sotta tóbeleske qatysqan 7 qyzǵa qatysty QR Ákimshilik quqyq buzýshylyq kodeksiniń 434 (usaq buzaqylyq) jáne 476-baptary (tótenshe jaǵdaı rejımin buzý) boıynsha sot boldy. Sonymen qatar, tóbeleske qatysqan bir qyz osy eki baptan bólek QR Ákimshilik quqyq buzýshylyq kodeksiniń 478-baby (tótenshe jaǵdaı rejımi tártibin buzýǵa ıtermeleý áreketi) boıynsha is qozǵaldy.
Pavlodar oblystyq Polıtsııa departamentiniń habarlaýynsha, tóbeleske qatysqandardyń bári 5, 10, 15 táýlikke qamaýǵa alyndy.
«Tóbeleske qatysqandardyń ekeýinde kámelettik jasqa tolmaǵan balalary bar, sol sebepti olardyń jazasy jeńildetilip, birine15 AEK, ekinshisine 10 AEK kóleminde aıyppul jazyldy. Olar ákimshilik jazadan bólek, ishki ister organdaryna «buzaqy tóbeleskish» retinde esepke alyndy», - deıdi baspasóz qyzmeti.
Sonymen qatar, tóbeleske qatysýshylardyń bárine qatysty QR QK-niń 389-baby, 3-bólimi (ozbyrlyq) boıynsha sotqa deıingi tergeý isi bastaldy.
«Barlyq qyz laıyqty jazasyn alady. Tergeýshiler qajetti tergeý amaldaryn júrgizip jatyr. Qajetti materıaldar jınaldy. Olardyń qanshalyqty deńgeıde kináli ekenderin sot sheshedi», - deıdi oblystyq Polıtsııa departamentiniń baspasóz qyzmeti.
