Pavlodarda aq tútek borannyń saldarynan jol apattary jıilep, bir aýdan jaryqsyz otyr
PAVLODAR. KAZINFORM — Búgin tústen keıin bastalǵan borannyń sońy dúleı daýylǵa ulasyp, oblys aýmaǵynda kóptegen avtojoldar jabyldy. 103 qyzmeti aýa raıynyń qolaısyzdyǵynan bolǵan jazataıym oqıǵalardy tirkep jatyr.
Oblystyq jedel járdem stansasynyń aqparynsha, tústen beri 4 iri jol-kólik oqıǵasy bolyp, birneshe adam zardap shekken.
— Pavlodar-Aqsý avtojolyndaǵy jańa kópirde birden 5 kólik soqtyǵysty. Oqıǵa ornynda 3 jedel járdem brıgadasy men Apattar medıtsınasy ortalyǵynyń brıgadasy jumys istedi. 1969 jáne 1981 jyly týǵan er adamdar tekserilýden bas tartty, al 1985 jylǵy taǵy bir zardap shegýshi dene jaraqattarymen Pavlodar qalalyq № 1 aýrýhanasyna jetkizildi. Sondaı-aq Sharbaqty kópirindegi jol apatynan keıin atalǵan aýrýhanaǵa 40 jas shamasyndaǵy er adam jetkizildi. Zardap shegýshiniń mıy shaıqalǵan, — dep habarlady jedel járdem qyzmetinen.
Oblys ortalyǵyndaǵy jol apatynan 4 adam zardap shekken. Jaraqat alǵan 1987 jylǵy áıel adam qalalyq № 1 aýrýhanaǵa jatqyzylǵan.
Al Pavlodar qalasyndaǵy kóshelerdiń birinde 37 jastaǵy er adamdy postamat basyp qalǵan. Zardap shegýshi travmatologııalyq pýnktke jetkizilgen. Dúleı daýyl Baıanaýyl aýdanyn jaryqtan ajyratyp tastaǵan. Aýdan boıynsha tek Maıqaıyń kentinde elektr jaryǵy bar. Aýdan boıynsha energetıkalyq mekemede 8 myńǵa jýyq abonent tirkelgen.
— Aýdan boıynsha at qulaǵy kórinbeıtin boran soǵyp tur. Sondyqtan energetıkalyq mekemeniń qyzmetkerlerin zaqymdanǵan jerlerdi izdep, qalpyna keltirý jumystaryna ázirshe jibermeı otyrmyz. Eń bastysy — adamdardyń ómiri saqtalýy kerek. Aýa raıy durystalǵan soń jóndeý brıgadasy aqaýdy izdeýge attanady. Boljam boıynsha Maıqaıyń — Baıanaýyl ortasyndaǵy elektr jelileriniń biri úzilgen, — deıdi aýdan ákimi Ardaq Kisentaev.
Aýa raıynyń kúrt buzylýyna jáne jazataıym oqıǵalardyń artýyna baılanysty polıtsııa, tótenshe jaǵdaılar jáne 103 qyzmetteri turǵyndarǵa saq bolý qajettigin eskertip otyr.
— Uzaq saparǵa shyǵýdan bas tartýdy usynamyz. Kóshege shyǵa qalsańyzdar jarnama taqtalarynan, bıik aǵashtar men turaqsyz konstrýktsııalardan aýlaq bolyńyzdar. Al júrgizýshiler araqashyqtyq pen jyldamdyq rejımin qatań saqtaýy kerektigin eskertemiz. Boran ýaqytynda jáne keptelis jaǵdaıynda shuǵyl qyzmetterdiń kelý ýaqyty uzarýy múmkin ekenin umytpańyzdar. Sondyqtan sizderdiń jeke saqtyqtaryńyz -qaýipsizdiktiń kepili, — deıdi oblystyq jedel járdem stansasy basshysynyń orynbasary Irına Mışenko.
Eske sala keteıik, aýa raıyna baılanysty eki óńirde kólik qozǵalysy shekteldi.
