Pavlodarda «Aga» atty fılm túsirilgeli jatyr
PAVLODAR. QazAqparat - Ertis óńirinde túsiriletin «Aga» fılmine akterlardy tańdaý úshin bir aıdan astam ýaqyt ketken. Bul týraly óńirlik kommýnıkatsııalar qyzmetinde ótken baspasóz konferentsııasynda «Aga» fılminiń rejısseri Farhat Cerkebaev aıtty, dep habarlaıdy pavlodarnews.kz.
- Pavlodarda ótken kastıngke eki myńnan astam adam qatysty, - deıdi Farhat Cerkebaev. - Qatysýshylardy bir aıdan astam ýaqyt tańdadyq. Sebebi, kastıng aıaqtalǵannan keıin úlgermeı qalǵan taǵy da úsh júzdeı adam keldi. Munda talantty jastar óte kóp. Olar bizdiń fılmde ózderiniń boıyndaǵy sol daryndy asha alady. Aımaýytov jáne Chehov atyndaǵy oblystyq teatrlardyń akterlary men buryn múldem kıno alańynda bolmaǵandar bar. Rejısser retinde basty mindetim - jańa talantty akterlardy ashý. Bul adamdardyń juldyzy janady degen oıdamyz. Bálkim, basqa rejısserler kórip, shaqyryp qalýy da múmkin.
Fılm rejısseri demeýshi bolǵan azamattar men jergilikti ákimdikke rızashylyǵyn bildirdi.
- Bizdiń komandanyń túsirilimge kiriskenine óte qýanyshtymyz, - deıdi Farhat Cerkebaev. - Sonymen qatar, akterlar - Murat Bısembın, Azamat Ybyraev, Azamat Dýlatov, operator-qoıýshy Nurbolat Qanashevqa alǵys aıtqym keledi. Basynan bastap, osy kınony túsirýge qoldaý tanytqan dırektorymyz Murat basty róldi oınaıdy jáne ári qaraı júzege asyrý joldary talqylandy. Bul ıdeıa kásipkerlerdiń de kóńilderinen shyǵyp, qarjylaı qoldaý tanytty. Pavlodarda úlken kıno jobasy iske qosylady. Biz úshin úlken tájirıbe bolady. Munda Almaty jáne basqa jerde jasaı almaıtyn dúnıelerdi iske asyrýǵa bolady. Ekshn-jobanyń test nusqasy bar. Túsirilim júrgiziletin jospar belgili boldy jáne bekitildi. Ertis óńirinde Toraıǵyr, Baıanaýyl jáne jaǵalaý sııaqty óte ádemi jerlerdi kórsetkimiz keledi.
Murat Bısembın kaskaderlar komandasy bir aıdan astam daıyndyq júrgizgenine toqtalyp ótti. "Bizdiń komanda jaýyngerlik sahna qoıady" deıdi akter.
- Sondyqtan bir aıdan astam daıyndyq júrgizdik. Belgili kaskader Baýyrjan Ábishevtiń komandasy bolady, alaıda búgin belgili sebeptermen kele almady. Ol jergilikti jastarmen daıyndyq jasaıdy. Óz basym bir aı Almatyda daıyndyqtan óttim. Bul jobanyń tolyǵymen kásibı turǵydan bolǵanyn qalaımyz.
Rejısserdiń aıtýynsha, fılmdi 23 kún ishinde túsirip shyǵý kózdelýde. Degenmen, odan artyq nemese azyraq ýaqyt ketýi de múmkin. Týyndy kórermenderdiń nazaryna kelesi jyly jol tartady dep josparlanyp otyr.
