Pavlodarda «Ádiletti qoǵamǵa — shynshyl sóz» kitabynyń tanystyrylymy ótti
PAVLODAR. KAZINFORM — Pavlodarda Memleket basshysynyń «Ádiletti qoǵamǵa — shynshyl sóz» kitaby tanystyryldy. Kitap elimizdiń qazirgi qoǵamdyq-saıası jáne áleýmettik-ekonomıkalyq damý úderisterin, qoǵam aldyndaǵy ózekti mindetter men el bolashaǵyna qatysty mańyzdy máselelerdi qamtıdy.
Memleket basshysy Qasym-Jomart Toqaevtyń 1994 jyldan bastap ár jyldary jarııa túrde aıtqan mańyzdy oı-tujyrymdary, saıası ustanymdary men qoǵamdyq-ekonomıkalyq máselelerge qatysty paıymdary toptastyrylǵan «Ádiletti qoǵamǵa — shynshyl sóz» atty kitaby zııaly qaýym arasynda qyzyǵýshylyq týdyryp otyr.
Dostyq úıinde ótken is-sharaǵa memlekettik qyzmetshiler, qalamgerler, jýrnalıster, mádenıet jáne bilim salasynyń ókilderi, zııaly qaýym músheleri men qoǵam belsendileri qatysty. Jańa eńbek elimizdiń qazirgi qoǵamdyq-saıası jáne áleýmettik-ekonomıkalyq damý úderisterin, qoǵam aldyndaǵy ózekti mindetter men el bolashaǵyna qatysty mańyzdy máselelerdi qamtıdy. Jınaqta ádiletti qoǵam qalyptastyrý, zań men tártipti nyǵaıtý, ulttyq biregeılikti saqtaý, bilim men ǵylymdy damytý, mádenıet pen rýhanı qundylyqtardy qoldaý, tsıfrlandyrý, ekologııalyq mádenıet jáne azamattyq jaýapkershilik máselelerine erekshe mán berilgen.
Jınalǵandar kitaptyń mazmundyq-qurylymdyq erekshelikterin, tarıhı-saıası máni men qoǵamdyq mańyzyn jan-jaqty talqylady. Zııaly qaýym ókilderi men ǵalymdar kitapta qamtylǵan oı-pikirlerdiń el damýynyń ár kezeńindegi qoǵamdyq-saıası protsestermen sabaqtastyǵyna toqtalyp, jınaqtyń tarıhı jadyny jańǵyrtý, ulttyq sana men azamattyq jaýapkershilikti nyǵaıtý turǵysyndaǵy rólin atap ótti.
Pavlodar oblysy ákiminiń orynbasary Aıgúl Malıkova Memleket basshysynyń baǵdarlamasy aıasynda júzege asyrylyp jatqan reformalardyń negizgi maqsaty — azamattardyń ál-aýqatyn arttyrý, memlekettik ınstıtýttardyń tıimdiligin kúsheıtý jáne qoǵamda zań men tártipke negizdelgen ádilet qaǵıdattaryn ornyqtyrý ekenine toqtaldy.
— Bizdiń jumysymyzdyń nátıjesi tek statıstıkalyq kórsetkishtermen nemese qaǵaz júzindegi eseptermen emes, eń aldymen halyqtyń ómir súrý sapasyn jaqsartýmen, azamattardyń máselelerin naqty sheshýmen jáne memleketke degen senimdi arttyrýmen baǵalanýy tıis. Osy oraıda «Ádiletti qoǵamǵa — shynshyl sóz» kitaby memlekettik qyzmetshiler úshin ǵana emes, zııaly qaýym ókilderi, jastar, kásipkerler jáne jalpy qoǵam úshin mańyzdy oı-tolǵamdar jınaǵy dep aıtýǵa todyq negiz bar, — dedi Aıgúl Malıkova.
Qazaqstan Jýrnalıster odaǵynyń múshesi, «Aq tulpar» jýrnalynyń redaktory Saılaý Baıbosynnyń aıtýynsha, eńbek 21 taraýdan turady jáne qoǵam ómiriniń negizgi baǵyttaryn qamtıdy.
— Kitapta syrtqy jáne ishki saıasat, ekonomıka, tsıfrlandyrý, til máselesi, ulttyq qaýipsizdik sekildi qoǵam úshin mańyzdy baǵyttardyń barlyǵy qamtylǵan. Ereksheligi — uzaq maqalalar men kólemdi mátinderden góri, oı-tujyrymdardyń aforızm túrinde berilýi. Sondyqtan kitapty oqý jeńil ári qajetti bólimdi tez taýyp, negizgi oıǵa nazar aýdarýǵa múmkindik beredi, — dedi Saılaý Baıbosyn.
Qazaqstan Jazýshylar odaǵynyń múshesi, ardager jýrnalıst Ǵalymbek Jumatov aǵa býynnyń jınaqtaǵan ómirlik tájirıbesi men bilimin jas urpaqqa jetkizýdiń mańyzdylyǵyna toqtaldy. Onyń aıtýynsha, kóregendik, parasat pen jyldar boıy qalyptasqan tájirıbe — keıingi býyn úshin baǵa jetpes qundylyq. Memleket basshysynyń eńbeginen de osyndaı ómirlik jáne kásibı tájirıbeniń sabaqtastyǵyn kórýge bolady.
Túıindeı aıtqanda, «Ádiletti qoǵamǵa — shynshyl sóz» jınaǵy — Qazaqstannyń saıası jáne qoǵamdyq damý evolıýtsııasyn zerdeleýge múmkindik beretin mazmundy derekkózderdiń biri. Kitaptaǵy ıdeıalyq tujyrymdar memleketshildik ustanymdardyń tarıhı sabaqtastyǵyn, qoǵamdyq jańǵyrýdyń negizgi qaǵıdattaryn jáne Ádiletti, Qýatty, Qaýipsiz ári Taza Qazaqstandy qalyptastyrý baǵytyndaǵy strategııalyq baǵdarlardy júıeli túrde paıymdaýǵa múmkindik beredi.
Eske sala keteıik, elimizde Ermek Serkebaevtyń murasyn túgendegen kitaptyń jańa basylymy jaryq kórdi.
