Pavlodarda adasyp ketken úsh aýyl turǵyny qutqaryldy

PAVLODAR. KAZINFORM - Olar Ekibastuzǵa qarasty Tórtúı aýylynan jaıaý shyǵyp, baǵyttarynan jańylǵan. Turǵyndardy tótenshe jaǵdaı qyzmetkerleri izdep tapty.

112 shuǵyl qyzmet pýltine Pavlodar oblysyndaǵy qyr aýmaǵynda úsh adamnyń adasqandyǵy týraly habarlama kelip túsken.

- Adamdardy izdeýge Ekibastuz qalasy tótenshe jaǵdaı basqarmasynyń qyzmetkerleri dereý shyqty. Qutqarýshylardyń áreketteriniń arqasynda er adamdar qysqa merzimde tabylyp, qutqaryldy, - dep habarlady óńirlik tótenshe jaǵdaı departamentinen.

Anyqtalǵandaı, ótken túnde olar Ekibastuzdan 75 shaqyrym jerde ornalasqan Tórtúı aýylynan jaıaý shyqqan. Alaıda jolda baǵdar joǵaltqan.

Qutqarylǵandarǵa medıtsınalyq kómek qajet bolǵan joq.

Eske sala keteıik, Jetisý oblysynda borandy túnde jolda turyp qalǵan kólikterden 73 adam qutqaryldy.