Pavlodarda adamdar jappaı ýlanǵan meıramhana ruqsatsyz jumys istegen

PAVLODAR. KAZINFORM - Sanıtarlyq dárigerlerdiń aıtýynsha, meıramhananyń qyzmetine tyıym salyndy, dep habarlaıdy Kazinform tilshisi.

Pavlodar oblystyq sanıtarlyq-epıdemıologııalyq baqylaý departamenti jappaı ýlanýdan keıin meıramhanaǵa barǵanyn habarlady. 8 maýsym kúni saǵat 4-te meıramhana qyzmetin toqtatý týraly qaýly shyqty.

— Aldyn ala málimet boıynsha, meıramhananyń sanıtarlyq-epıdemıologııalyq sáıkestik sertıfıkaty joq, meıramhana ruqsatsyz jumys istegen. Osyǵan baılanysty Bellagio meıramhanasynyń qoǵamdyq tamaqtaný nysanynyń qyzmetine tyıym salý týraly qaýly shyǵaryldy. Qaýly 8 maýsymda shyǵaryldy jáne meıramhana sanıtarlyq-epıdemıologııalyq sertıfıkat alǵanǵa deıin kúshinde bolady, — dedi Pavlodar oblystyq sanıtarlyq-epıdemıologııalyq baqylaý departamenti basshysynyń orynbasary Gúlnar Aqylbekova.

Tergeý bastaldy. Qazirgi ýaqytta zerthanalyq tekseris úshin sýdyń, azyq-túliktiń, qural-jabdyqtardyń úlgileri jáne ınventarlyq jaǵyndylar alyndy. Sondaı-aq qyzmetkerler dızenterııa, salmonellez jáne stafılokokqa tekserildi. Jeti qyzmetker jumystan shettetildi.
Al juqpaly aýrýlar aýrýhanasy búgin taǵy úsh adamnyń aýrýhanaǵa jatqyzylǵanyn habarlady.

— Bizge 8 maýsymda sol meıramhanadaǵy toıda bolǵan taǵy úsh adam habarlasty. Naýqastardyń sımptomdary uqsas, qusý, dene qyzýynyń kóterilýi, ish aýrýy. Olar da aýrýhanaǵa jatqyzyldy, jaǵdaıy ortasha aýyr, — deıdi Sultanov atyndaǵy Pavlodar oblystyq aýrýhanasynyń jalpy ınfektsııa bóliminiń meńgerýshisi Qymbat Qaramoldına.

Buǵan deıin Pavlodarda qyz uzatý toıynan keıin 33 adam ýlanǵanyn habarlaǵan edik.