Pavlodarda Abylaıdyń joryǵymen baılanysty eskertkish belgi ornatyldy
ASTANA. QazAqparat -Pavlodar oblysynda aýyl azamattary han Abylaıdyń erlik joryǵyn dáripteıtin eskertkish belgi ornatty. Bul týraly Habar 24 jazady.
«Abylaı, naıza mekeni» nemese «Shabanbaı jaıylymy» dep atalatyn tarıhı jer Baskól aýylynyń irgesinde jatyr. Babalardyń izi qalǵan kıeli meken jaıynda ańyz-áńgimeler shejireshilerden jáne aýyl aqsaqaldarynan jetken.
Jaýgershilik zamanda Jońǵar shapqynshylary Qalmaqqyrylǵan taýynyń eteginde úlken toıtarysqa ushyraıdy. Dál sol joly jaýǵa qarsy atoı salǵan qalyń ásker Shabanbaı degen dáýletti adamnyń jaıylymyna kelip úsh kún aıaldapty. Jaýjúrek batyrlardyń jolsoqty keıpin kórgen jomart jan han Abylaıdyń qaramaǵyndaǵy jasaqqa 500 sáıgúlik mingizip, kıim-keshek pen as-sýlaryn ázirlep bergen desedi. Endi bul jer tarıhshylardyń nazaryn aýdartyp otyr.
«Óz áskerimen at dúbirin toqtatqan, myna naızasyn qadaǵan jerge búgingi kúni eskertkish turǵyzylyp otyr. Osy eskertkish bolashaq urpaqty tól tarıhyn bilýge, tárbıeleýge, baǵalaýǵa, maqtan tutýǵa tárbıeleıdi dep esepteımin»,- deıdi tarıhshy Aıgúl Muhamedııarova.
