Pavlodarda Abylaı zamanynan qalǵan kórik saqtalyp tur
PAVLODAR. KAZINFORM - Baıanaýylda ataqty Shoń bıdiń atasy Tólebaı batyrdyń HVІІ ǵasyrda ustaǵan kórigi saqtalyp tur. Jońǵar shapqynshylyǵy kezinde bul kóriktiń kómegimen qazaq jasaqtaryna qajetti myltyq, qylysh, oq-dári daıyndaý úshin temir qorytylǵan.
Tarıhı derekterge súıensek, Tólebaı batyr - XVII ǵasyrda ómir súrgen ataqty Edige bıdiń ákesi. Tólebaı aty shyqqan batyrlyǵymen qosa, ustalyqpen el-jurtyna tanylǵan. Negizgi qańqasy aǵashtan, úrme terisi túıeniń qom terisinen jasalǵan kóne jádigerdi Tólebaı batyrdyń ózi ustaǵan eken. Jádiger áli kúnge isten shyqpaǵan kúıi saqtalyp túr.
- Tólebaı Janǵozyuly degen atamyz temirdi óz qolymen qorytyp, shıti myltyq, zeńbirek soqqan kóne zamanda. Temir qorytý qazaq dalasynda bastalǵany málim. Bul kórik - órkenıettiń belgisi. Erte kezde temirshi ustalar otty laýlatyp jaǵý úshin osy quralmen aýyq-aýyq úrlep otyrǵan. Kóriktiń ishine aýa jınalyp, ony basqan kezde arnaıy tútik arqyly otqa baǵyttalady. Qatty úrlengen aýanyń arqasynda kómir mazdap janyp, temirdi soǵýǵa bolatyndaı joǵary temperatýraǵa jetken, - deıdi QR týrızm salasynyń úzdigi, elimizge belgili ólketanýshy Altynbek Qurmanov.
Bul kórik atadan balaǵa berilip, tórt ǵasyrǵa deıin óziniń qajettiligin joǵaltpaı kelgen. Altynbek aǵanyń atasy Qurman Ámiruly da ustalyǵymen tanylyp, keńes ókimeti kolhoz-sovhozdarda usta bolǵan. At taǵalap, soqa jóndegen, pyshaq pen balta soqqan. Qazaq arasynda ustalardyń kóbi kóship-qonýǵa yńǵaıly, jınalmaly kórikterdi paıdalanǵany málim. Tólebaı ata urpaqtarynda jınalmaly kórik te bar kórinedi. Al qarý-jaraq soǵatyn mynaý kórik kóbine úlken ustahanalarda ustalǵan.
- Bul kórikti ákem Jumat Qurmanuly da uzaq jyldar paıdalandy. Іnim Qylyshbektiń ustalyq óneri bar. Jýyqta inim kóriktiń ábden keýip qalǵan úrme terisin jylqynyń terisin ıletip qaıtadan qaptady. Qazirgi ýaqytta qystaqtaǵy ustalyqqa ornatylyp, tolyqqandy jumys istep tur. Kerek-jaraqtyń barlyǵyn osy kórikti paıdalanyp, soǵyp alamyz. Óte yńǵaıly ári otty qajetti temperatýraǵa tez kóteredi. Abylaı zamanynan qalǵan qol kórik bizdiń áýletimizdiń qut-berekesi bolyp tur. Tarıhı jádigerdiń túpnusqasyn saqtap qana qoımaı, ustalyq ónerdi jaǵyrtyp júrgenimizdi maqtan tutamyz, - deıdi ólketanýshy.
Eske sala keteıik, Pavlodarda Tasmola mádenıetiniń sheberleri jasaǵan kóne qanjar saqtalyp tur.