Pavlodarda ábden eskirgen jylý-energııa ortalyǵy jańǵyrtýdan ótedi

PAVLODAR. KAZINFORM — Ertis-Baıan óńirinde aldaǵy jyldary elektr stansalarynyń qýatyn arttyrý, jańadan MAES salý josparlanyp otyr. Energetıkalyq nysandardyń jıyntyq qýaty 14 myń MVt-qa jetýi yqtımal.

Oblysta Ekibastuz MAES-2 stansasynda qosymsha energobloktardy iske qosý, árbiriniń qýaty 660 MVt bolatyn tórt energoblogy bar Ekibastuz MAES-3 stansasynyń qurylysyn bastaý josparlanyp otyr. 

— Budan bólek, Aqsý MAES stansasy men Pavlodardaǵy JEO-2 ortalyǵyn jańǵyrtý, sondaı-aq balamaly energetıka jobalaryn, onyń ishinde qýaty 500 jáne 1000 MVt bolatyn jel elektr stantsııalaryn salý kózdelgen. Nátıjesinde óńirde jalpy ornatylǵan qýat kólemi 14 myń MVt-qa deıin artyp, eldiń energetıkalyq balansyndaǵy úlesi 50% asatyn bolady, — dep habarlady oblys ákiminiń baspasóz qyzmetinen.

Pavlodar halqy bárinen buryn jergilikti JEO-2 stansasynyń jańartylatynyna qýanýly. Atalǵan ortalyq óte kóne, 1961 jyly paıdalanýǵa berilgen. Ári ol shaharda paıda bolǵan alǵashqy jylý stansasy.

Buǵan deıin Atyraýda elektr qýaty tapshylyǵy týyndap, kóshe jaryǵy 3 saǵatqa kesh qosylyp jatqany týraly jazǵanbyz.