Pavlodarda Abaıǵa eskertkish ornatyldy

PAVLODAR. QazAqparat – Bıyl qazaqtyń uly aqyny, kompozıtor, aǵartýshy, fılosof Abaı Qunanbaıulynyń 175 jyldyǵyna oraı elimiz qalalarynda eskertkishter ornatylyp jatyr. Pavlodardaǵy eskertkish qalanyń ortalyq alańynan oryn tepti, dep habarlaıdy QazAqparat.

Abaı músini kórkem qoladan, tuǵyry granıtten jasalǵan, bıiktigi – 5,25 metr. Tuǵyrǵa Abaıdyń «Adamzattyń bárin súı, baýyrym dep...» degen tsıtatasy jazyldy. Eskertkishtiń avtory – Qazaqstan Sýretshiler odaǵynyń múshesi, músinshi Asqar Nartov. Onyń eskızdik jobasyn QR Mádenıet jáne sport mınıstrligi janyndaǵy Qazaqstandaǵy monýmentaldy ónerdiń jańa qurylystaryn ornatý boıynsha komıssııa músheleri tańdady.

«Bul Hákim Abaıdyń ornatylǵan ádettegi eskertkishterdiń biri ǵana emes, uly qundylyqtar men rýhanııatty eske salyp turatyn qasıetti músin! Tán emes, jannyń azyǵyn izdep, adam bolmysyn túsinýge tyrysqan Abaı jazbalarynyń jańǵyrǵy, mine, osy kúnge jetti. Onyń ár sózi osy jerde turǵan adamdardyń janyna qýat, rýhyna jiger, sanasyna aqyl beretinine senimdimin», - dedi Pavlodar oblysynyń ákimi Ábilqaıyr Sqaqov ashylý saltanatynda.

Abaı eskertkishin óńir basshysymen birge abaıtanýshy, qazaq fılosofııasy tarıhyn zertteýshi Ǵarıfolla Esim, opera ánshisi, Qazaqstannyń eńbek sińirgen ártisi Shahımardan Ábilov jáne oblystyq ardagerler keńesiniń tóraǵasy Rymtaı Shókeev ashty. Saltanatty rásimge Pavlodar qalasynyń kórnekti óner, mádenıet, ádebıet jáne jýrnalıstıka qaıratkerleri qatysty. Qonaqtar jańa eskertkishke gúl shoqtaryn qoıyp, onyń qalanyń basty ári kórikti jerleriniń biri bolatynyna senim bildirdi.

Eskertkish ashylǵannan keıin Ábilqaıyr Sqaqov sharanyń qurmetti meımandarymen birge oblystyq kitaphanada shyǵarmashyl jastarmen kezdesti. Bul ádebıette, mýzykada, jýrnalıstıkada, kórkem jáne teatr ónerinde ózderin damytyp júrgen jastar.

«Abaı - jastardyń mańyzdy dosy, óıtkeni ol máńgi jas. Men 40-50 jastaǵy adamdardy «qola» dep ataımyn. 30-40 jastaǵylar – «kúmis». Al 15-25 jastaǵy jastar – «altyn» urpaq. 10 jyldan keıin eldi basqaryp, keıingi urpaqtyń bolashaǵyn quratyn sizder!», - dedi jas urpaq ókilderine Ǵarıfolla Esim.

Kezdesýge qatysqandardyń arasynda Shaqat aýyldyq mektebiniń oqýshysy Galına Evloeva da boldy. Onynshy synyp oqýshysy qazaq tilin úırenýdi Abaı shyǵarmalarynan bastaý kerek ekenin aıtyp, aqynnyń «Júregim, neni sezesiń?» atty óleńin oqyp berdi. Qazaqstannyń eńbek sińirgen ártisi Shahımardan Ábilov Abaıdyń taǵy bir tanymal shyǵarmasy «Kózimniń qarasy» ánin oryndady. Tanymal ándi búkil zal qosyla shyrqady.

Odan soń qonaqtar daryndy balalarǵa arnalǵan №10 gımnazııada boldy. Bıyl mektepke Abaı esimi berilgeli 80 jyl toldy. Osy jyly oqý ornynda jańa korpýs salynyp, kúrdeli jóndeý jumystary júrgizildi, «Zamanaýı mektep» baǵdarlamasy boıynsha bezendirilip, jabdyqtaldy.

Sýretti túsirgen Valerıı Býgaev