Pavlodarda Abaı murasynyń aýdıojınaǵy jaryq kórdi

PAVLODAR. KAZINFORM – Kerekýde «Abaı murasy – máńgilik baǵdar» atty erekshe aýdıojınaq jobasy jaryq kórdi. Bul – hákim Abaıdyń tereń mazmundy qara sózderin zamanaýı formatta keń aýdıtorııaǵa qoljetimdi etýge baǵyttalǵan mádenı bastama.

Atalǵan jobanyń avtory – Qazaqstan Jýrnalıster odaǵynyń múshesi, «Halyq radiosy» radıosynyń tilshisi Eldos Tóleýbaev. Ol balalyq armanyn oryndaǵanyna qýanyshty ekenin jetkizdi. 

– Mektep qabyrǵasynda oqyp júrgen kezde «Abaı oqýlaryna» qatysyp, Nurlan Ónerbaevtyń oryndaýyndaǵy Abaıdyń qara sózderin alǵash ret taspadan tyńdap, bolashaqta dál osylaı oqyp shyǵýdy arman ettim. Araǵa 24-25 jyl salyp, kópten kútken josparym iske asty. Astana qalasynan Janna Qabdeshqyzy esimdi kásipker demeýshilik tanytyp, jobanyń jaryqqa shyǵýyna zor úlesin qosty. Budan bylaı bul aýdıojazba ashyq túrde taratylady. Ony «Aiqara», «Halyg radiosy» saıttarynan tyńdaýǵa bolady. Aldaǵy ýaqytta oblystyq, qalalyq depýtattardyń qoldaýymen qoǵamdyq kólikterde Abaıdyń Qara sózderi qoıylsa degen oıym bar, - deıdi Eldos Tóleýbaev.

Óńir tarıhynda iz qaldyratyn jobany qolǵa alǵan óskeleń urpaqtyń janashyrlary bastaǵan isti ári qaraı damytýdy kózdep otyr. Іs-sharaǵa jınalǵandar búgingi jastardyń kitap oqýǵa qyzyǵýshylyqtary oıanyp, aýdıojazbadaǵy tereń oıly naqyl sózderi sanalaryna jetetinine senip, jyly lebizderin bildirdi. Sondaı-aq kesh barysynda óńirimizdiń joǵary oqý oryndary, mádenıet mekemeleri men aqparattyq uıymdaryna uly Abaıdyń qara sózi jazylǵan aýdıojazba taspasy tabys etildi. 

Eske sala keteıik, Astanada Abaıdyń 180 jyldyǵyna oraı poezııalyq-mýzykalyq kesh ótti.