Pavlodarda abattandyrý talaptaryn buzýǵa qatysty 5 myńǵa jýyq derek anyqtaldy
ASTANA. KAZINFORM — Pavlodarda abattandyrý talaptaryn buzǵandar jaýapqa tartyldy, dep habarlaıdy Іshki ister mınıstrliginiń baspasóz qyzmeti.
Pavlodar oblysynda «Taza Qazaqstan» ekologııalyq aktsııasy aıasynda abattandyrý qaǵıdalaryn buzý men qoǵamdyq oryndardy lastaý faktileriniń jolyn kesýge baǵyttalǵan reıdtik is-sharalar jalǵasyp jatyr.
Polıtsııa qyzmetkerleri ruqsat etilmegen qoqys oryndary paıda bolatyn aýmaqtardy turaqty baqylaýǵa alyp, turmystyq jáne qurylys qaldyqtaryn belgilenbegen jerlerge tógetin, sondaı-aq las sýlardy ruqsat etilmegen aýmaqtarǵa aǵyzatyn azamattardy anyqtaıdy.
Maqsat — qoǵamdyq tártipti saqtaý ǵana emes, turǵyndar arasynda qorshaǵan ortaǵa jaýapkershilikpen qaraý mádenıetin qalyptastyryp, zań buzýshylyqtarǵa «nóldik tózimdilik» qaǵıdatyn ornyqtyrý.
Máselen, Pavlodar qalasynyń Mının kóshesinde qaraýsyz qalǵan jeke úıdiń ıesi ózine tıesili jer ýchaskesin turmystyq qaldyqtar men qoqysqa toltyryp, oǵan irgeles aýmaqty sanıtarııalyq talaptarǵa saı emes jaǵdaıda ustaǵan. Bul áreket abattandyrý qaǵıdalaryn buzý retinde tirkelip, turǵynǵa qatysty ákimshilik materıal toltyryldy.
— Jyl basynan beri polıtsııa qyzmetkerleri abattandyrý salasynda oryn alǵan 5 myńǵa jýyq quqyq buzýshylyqtyń jolyn kesti. Reıdtik jumystar belgilenbegen jerlerge qoqys tastaý faktileriniń aldyn alýǵa jáne qoǵamdyq oryndardyń tazalyǵyn saqtaýǵa baǵyttalǵan, — deıdi Pavlodar oblysy polıtsııa departamenti.
Polıtsııa azamattardy abattandyrý talaptaryn saqtap, qorshaǵan ortaǵa uqypty qaraýǵa shaqyrady.
— Eger qoǵamdyq oryndardyń lastanǵanyn, qurylys nemese turmystyq qaldyqtardyń belgilenbegen jerlerge jınalǵanyn baıqasańyz, bul týraly «102» arnasyna habarlaýǵa bolady, — dep eskertti tártip saqshylary.
Buǵan deıin Pavlodar turǵyny zańsyz berilgen jerdi ákimdikten sot arqyly qaıtaryp alǵanyn jazǵanbyz.
