Pavlodarda 9 jáne 10 aılyq sábıler hımııalyq tazartqyshtan kúıip qaldy
PAVLODAR. KAZINFORM — Oblys ortalyǵynda qos sábı qyz «Azelıt» tazartqysh quralynan kúıip, oblystyq balalar aýrýhanasyna jatqyzyldy.
— Balalar aýrýhanasyna tazartqysh quralmen janasý saldarynan hımııalyq kúıik alǵan eki qyz bala kelip tústi. Dárigerler qajetti em júrgizdi. Ekeýi de 2024 jyly týǵan. Alǵashqysynyń sol jaq sıraǵy men oń jaq sanynda II–III dárejeli kúıik jaraqaty bar. Ekinshi qyz balada oń jaq bilegi, qoldyń býyny, sany jáne qursaq qabyrǵasy kúıgen. Eki jaǵdaıda da kúıikterge «Azelıt» tazartqysh quralynyń terige tııýi sebep bolǵan, - dep habarlady óńirlik balalar aýrýhanasynan.
Dárigerler turmystyq hımııa balalar úshin asa qaýipti ekenin eskertedi. Qaýipti jaǵdaılardyń aldyn alý úshin turmystyq hımııany balalardyń qoly jetpeıtin jerde saqtaýǵa, hımııalyq quraldary bar shkaftardy arnaıy buǵattaýyshtarmen jaýyp qoıýǵa keńes beredi.
— Hımııalyq suıyqtyqtardy nemese untaqtardy ózge bótelkelerge quımańyz. Tazartqysh quraldardy ashyq kúıinde qaldyrýǵa múlde bolmaıdy. Al quraldy paıdalanǵan kezde bala qaýipsiz qashyqtyqta bolýy kerek. Hımııalyq zat terige tıse, kúıgen jerdi dereý kóp mólsherde aǵyndy sýmen jýyp, shuǵyl medıtsınalyq kómekke júginý qajet. Eger tótenshe jaǵdaı oryn alsa, dereý jedel járdem shaqyrǵan abzal», - deıdi mamandar.
Eske sala keteıik, byltyr Aqsý ferroqorytpa zaýytynda ystyq sýǵa kúıip qalǵan mashınıst qyz aýrýhanada kóz jumǵan edi.