Pavlodarda 80 jastaǵy zeınetkerdi jalǵan aqshamen aldaǵan alaıaq ustaldy
NUR-SULTAN. QazAqparat - Pavlodar qalasynyń polıtsııasyna alaıaqtyń aldaýyna túsken 80 jastaǵy zeınetker aqshalaı qarajatynyń urlaǵany týraly aryzben júgindi, dep habarlaıdy pavlodarnews.kz.
Oblystyq polıtsııa departamenti baspasóz qyzmetiniń málimetinshe, tergeý barysynda úıdiń mańynda otyrǵan zeınetkerdiń janyna belgisiz bir er adam jaqyndap, zeınetkermen áńgimeleskeni anyqtaldy. Áńgime barysynda zeınetker kúdiktini páterine shaqyryp, oǵan fotosýretterin kórsetken.
- Kúdikti birneshe kúnnen keıin sol úıge kelip, zeınetkerge eriktilerdiń atynan 6000 teńge kóleminde aqshalaı qarajat berýi tıis ekenin aıtyp, jalǵan on myń teńge usynǵan. Aldanyp qalǵan zeınetker alaıaqqa tórt myńdy qaıyryp bergen, - deıdi departamentten.
Zeınetkerdiń qaltasyndaǵy artyq aqshany kórgen alaıaq sol kúni páterge taǵy kelip, kireberiste aqsha jatqan shalbardaǵy barlyq aqsha qarajatyn alyp, qashyp ketken.
Tártip saqshylary alaıaqty bir táýliktiń ishinde ustaǵan. Ol 27 jastaǵy oblys ortalyǵynyń turǵyny bolyp shyqty.
Aıta keterligi, er adam birneshe kún buryn osyndaı qylmystyq jolmen 93 jastaǵy zeınetkerdi de aldaǵan. Oǵan qatysty QR QK-nyń 191-baby boıynsha sotqa deıingi tergeý bastaldy.
