Pavlodarda 8 jasar bala ózenge batyp ketti
PAVLODAR. QazAqparat - Pavlodardaǵy Ýsolka shaǵyn aýdanynda 8 jasar bala sýǵa batyp ketti, dep habarlaıdy QazAqparat pavlodarnews.kz-ke silteme jasap.
Oblystyq TJD baspasóz qyzmetiniń málimetinshe, oqıǵa 10 shilde kúni oryn alǵan.
«Saǵat 18.40-ta Ýsolka shaǵyn aýdanynda ornalasqan № 4 emhananyń qasynda aǵyp jatqan Ertis ózenine 2010 jylǵy bala batyp ketti. Balanyń denesin jedel qutqarý bóliminiń tórt qyzmetkeri jaǵaǵa alyp shyqty. Bala shomylýǵa arnalmaǵan jerde sýǵa túsken. Qansha eskertý jasasaq ta, turǵyndar qulaq aspaıdy. Onyń sońy qaıǵyly oqıǵamen aıaqtalyp otyr» deıdi TJD baspasóz qyzmetindegiler.
Eske sala keteıik, 9 shildede TJD ótkizgen jospardan tys jıynda aıdyń basynan beri oblys aýmaǵyndaǵy sý aıdyndarynda 8 adam kóz jumǵany aıtylǵan bolatyn. Onyń tórteýi - bala.
«Biz turǵyndardy talaı ret eskerttik, - deıdi bas qutqarýshy Erqanat Aqqozınov. - Ertis ózenindegi sýdyń deńgeıi ótken jylǵa qaraǵanda joǵary. Jaǵajaıǵa jaqyn jáne shomylý úshin asa qaýipti jerlerde 100-den astam eskertý jáne tyıym salý belgisi ornatylǵan. Oblys ortalyǵynda jáne Ekibastuz, Aqsý qalalarynda sýdaǵy qaýipsizdik qaǵıdalaryn saqtaýdy eskertetin bannerler ornalastyrylǵan».
