Pavlodarda 779 adam turǵyn úı kezeginen zańsyz shyǵarylǵan
ASTANA. KAZINFORM — Pavlodarda turǵyn úı kezeginen shyǵarylǵan júzdegen adam qaıta kezekke qoıyldy.
Pavlodar qalasynyń prokýratýrasy halyqtyń áleýmettik osal toptaryna jatatyn azamattardyń turǵyn úı quqyqtarynyń buzylǵanyn anyqtady. Atap aıtqanda, azamattardy turǵyn úıge muqtajdar esebinen negizsiz shyǵarý faktileri anyqtaldy. Buǵan jergilikti atqarýshy organnyń turǵyn úı zańnamasy normalaryn durys qoldanbaýy sebep bolǵan.
— Júrgizilgen jumys nátıjesinde 779 azamat bastapqy esepke qoıylǵan kúninen bastap turǵyn úı kezegine qaıta engizildi. Elektrondyq bazaǵa tıisti ózgerister engizildi. Sondaı-aq Şerbaqty aýdanynda da buzýshylyqtar anyqtaldy. Zańdy ókilder jetim balalar men ata-anasynyń qamqorlyǵynsyz qalǵan balalardy turǵyn úı kezegine ýaqtyly qoımaǵan. Mysaly, ata-anasynyń qamqorlyǵynsyz qalǵan eki apa-sińli 2025 jylǵy shildede turǵyn úı kezegine turý quqyǵyna ıe bolǵan. Alaıda is júzinde olar esepke tek bir jyldan keıin qoıylǵan. Osyǵan uqsas taǵy 16 balanyń quqyqtary buzylǵan, — delingen vedomstvo habarlamasynda.
Budan bólek, 2017 jyldan beri turǵyn úı kezeginde turǵan jetim bala turǵyn úı esebinen zańsyz shyǵarylǵan.
Bul rette jetim balalar men ata-anasynyń qamqorlyǵynsyz qalǵan balalar turǵyn úı alǵanǵa deıin esepten shyǵarylýǵa jatpaıdy.
Prokýrorlyq qadaǵalaý aktileri boıynsha buzýshylyqtar joıyldy: balalardy esepke qoıý merzimderi zańnamaǵa sáıkestendirildi, al kezekten zańsyz shyǵarylǵan bala quqyq paıda bolǵan kúnnen bastap — 2016 jyldan bastap turǵyn úı kezegine qaıta qalpyna keltirildi.
Osydan buryn Aqmola oblysynda turǵyn úı kezeginde 9 qaıtys bolǵan jáne jyljymaıtyn múlki bar adamdar turǵanyn jazǵanbyz.
