Pavlodarda 776 kópqabatty úı ystyq sýsyz otyr

PAVLODAR. QazAqparat - Pavlodar oblysynyń jylytý maýsymyna daıyndyǵy týraly onlaın ótken apparattyq jıynda oblys ortalyǵyndaǵy 776 kópqabatty úı ystyq sýsyz otyrǵany aıtyldy, dep habarlaıdy Pavlodarnews.kz.

Bul týraly oblystyq energetıka jáne turǵyn úı-kommýnaldyq sharýashylyq basqarmasynyń basshysy Erjan Ertaev málim etti.
- Mamyrda gıdravlıkalyq qysym arqyly jelilerde synaq boldy. 263 aqaý tabylyp, búginde 215 aqaý jóndeldi. 3 tamyzda jylý jelilerinde taǵy synaq júrgizildi. Sol synaqtan keıin Pavlodar qalasynda 776 kópqabatty úı ystyq sýsyz otyr, - dedi Erjan Ertaev.

Basqarma basshysynyń sózine qaraǵanda, jylý jelilerin jóndeý boıynsha Pavlodar qalasy men Baıanaýyl aýdany jospardan qalyp keledi. Oblys ortalyǵynda 6,1 shaqyrym jylý jelisi jóndelý kerek. Qazirgi ýaqytta 1,86 shaqyrymda ǵana jumys aıaqtaldy. Al, Baıanaýyl aýdanynda 4,2 shaqyrym jóndelý kerek bolsa, búginde 0,6 shaqyrym ǵana jóndelgen.
Oblys ákimi Ábilqaıyr Sqaqov 1 qyrkúıekke deıin úılerdiń jylytý maýsymyna daıyn bolýyn tapsyrdy.
- Aýdan men qala ákimderi 1 qyrkúıekke deıin jumystardy aıaqtaýy tıis. Sol ýaqytta úıler jylytý maýsymyna daıyn ekendigi jóninde qujatymen otyrýy qajet. Sondaı-aq, halyq úshin kómir baǵasyn qazirden qatań baqylaýǵa alý kerek. Qymbatshylyqqa jol berýge bolmaıdy. Ken oryndaryndaǵy baǵany da bilip otyrýǵa tıispiz. 15 tamyzǵa deıin bıýdjettik uıymdarǵa kómirdi jetkizý boıynsha kelisimsharttar jasalyp bitýi kerek, - dedi Ábilqaıyr Sqaqov.

Aıta keteıik, Pavlodar oblysynda jylytý maýsymy kezinde turǵyndar men bıýdjettik uıymdarǵa 560 myń tonna qatty otyn qajet. Turǵyndar – 427 myń tonna, bıýdjettik uıymdar 132 myń tonna kómir jaǵady. Búginde tasymaldaýshylarmen bıýdjettik uıymdarǵa 128 myń tonna kómir jetkizý jóninde kelisimshart jasalǵan.