Pavlodarda 700-den astam muǵalimniń eńbekaqysy 50 paıyzǵa deıin ósedi

Bul týraly óńirlik kommýnıkatsııalar qyzmetinde ótken baspasóz jıynynda oblystyq bilim berý basqarmasy basshysynyń orynbasary Jomart Qarambaev aıtty.

«Ótken oqý jylynyń aıaǵynda jańa úlgidegi muǵalimderdiń attestatsııalaýy júrgizilgen bolatyn, - dedi Jomart Qarambaev. - Bizdiń muǵalimder jaqsy kórsetkish kórsetti. Respýblıkada aldyńǵy qatardamyz. Oblysymyzda 46 muǵalim «Sheber pedagog» biliktiligin rastady. 728 ustaz - «Zertteýshi pedagog» deńgeıin kórsetti. Bul kórsetkish kadr áleýetiniń sapaly deńgeıin dáleldeıdi. Atalǵan jańashyldyq pedagog kásibiniń bedelin arttyryp, ádil eńbekaqynyń tólenýin qamtamasyz etedi. Qyrkúıek aıynan bastap jańa sanat alǵan pedagogtardyń eńbekaqysy 50 paıyzǵa deıin ósedi. Bul 50 myń teńge nemese odan da kóp aqsha bolýy múmkin», - dedi ol.

Atalǵan sanattaǵy muǵalimderge Bilim jáne ǵylym mınıstrligi tarapynan qoıylǵan talaptar bar. Olardyń test tapsyrýynda joǵary talaptar qoıylady. Mysaly, «sheber pedagog» respýblıkalyq, halyqaralyq olımpıadalardyń jeńimpazdaryn daıyndaýy kerek. Tájirıbesin oblystyq deńgeıde jalpylaýy tıis.

Spıkerdiń aıtýynsha, jaratylystaný-matematıka baǵytynda óz pánderi boıynsha aǵylshynsha sabaq úıretken muǵalimderge qosymsha aqy tólenedi.

«2018-2019 oqý jylynda jańartylǵan baǵdarlama boıynsha ınformatıka, matematıka, hımııa, bıologııa pánderinen aǵylshynsha bilim beretin ustazdarǵa 35 myń teńge qosymsha aqy tólenedi. Ótken oqý jylynda 192 muǵalim dál osy baǵytta eńbekaqylaryna qosymsha aqy aldy», - dedi Jomart Qarambaev.

Sonymen qatar, basqarma basshysy orynbasarynyń málimdeýinshe, óńirimizde 100-den astam muǵalimderdiń jetispeýshiligi bar. Olardyń kóbisi aýyldyq jerlerde tirkelgen. Bos oryndardy jas mamandardyń kelýimen jáne zeınetker ustazdardy shaqyrýmen toltyrý josparlanǵan.

Aıta keteıik, Pavlodar oblysynda bilim berý oryndarynda 11,5 myń muǵalim bar.