Pavlodarda 70 mln teńgeden astam qaryzy bar boryshker ustaldy
PAVLODAR. KAZINFORM - Er adam eki jyl boıy qaryzyn tólemeı qashyp júrgen. Ol bir táýlikke ákimshilik qamaýǵa alyndy.
Pavlodar oblystyq ádilet departamentiniń memlekettik sot oryndaýshysy Jánibek Týsipbekov memleket paıdasyna 70 mıllıon teńgeden astam somany óndirý týraly atqarý qujatynyń talaptaryn oryndamaǵan boryshkerdiń qolǵa túskenin habarlady. Boryshkerge qatysty QR Ákimshilik quqyq buzýshylyq týraly kodekstiń 669-baby boıynsha hattama toltyryp, qarastyrý úshin sotqa joldandy.
- Memleketke 70 mıllıon teńge qaryz bolǵan boryshker 2 jyl boıy izdeýde júrgen. Ekonomıkalyq tergep-tekserý departamentimen ózara is-qımyl jáne birlesken kúsh-qımyldyń arqasynda izdeýde júrgen azamat ustaldy. Sot qaýlysymen boryshker bir táýlikke qamaý túrindegi ákimshilik jazaǵa tartyldy, - dep málimdedi óńirlik ádilet departamentiniń baspasóz qyzmetinen.
Eske sala keteıik, Ádilet mınıstri boryshkerlerdiń múlkin aýktsıonda satý kezindegi «sur shemany» atady.