Pavlodarda «7-20-25» baǵdarlamasy boıynsha alǵashqy ıpoteka berildi
PAVLODAR. QazAqparat - Pavlodar turǵyny atalmysh memlekettik baǵdarlama boıynsha Astanadan páter alýǵa bel býdy, dep habarlaıdy QazAqparat pavlodarnews.kz-ke silteme jasap.
Alǵashqy zaımdy «Bank TsentrKredıt» AQ oblystyq fılıaly berdi.
«Men 14 mıllıon teńgelik ıpotekany 20 jylǵa rásimdedim. Aı saıyn bankke shamamen 90 myń teńge tóleýim kerek», - dep aǵynan jaryldy «7-20-25» boıynsha oblystaǵy alǵashqy nesıe alýshy Erbolat Mákenov.
«Bank TsentrKredıt» AQ atalǵan memlekettik baǵdarlama boıynsha jumysty 2018 jyldyń shilde aıynda bastaǵan bolatyn. Banktiń oblystyq fılıalynyń dırektory Dáýren Orazbaevtyń aıtýyna qaraǵanda, búgingi tańda bank taǵy bir ıpotekalyq ótinishti maquldaǵan.
«Nesıe ótinishteri orta eseppen úsh kún ishinde qarastyrylady. Bastysy - ótinish berýshiniń jeke baspanasy bolmaýy shart», - deıdi Dáýren Orazbaev.
Esterińizge sala keteıik, 5 naýryz kúni Memleket basshysy Nursultan Nazarbaev árbir jumys isteıtin qazaqstandyqqa baspana satyp alýǵa múmkindik beretin «7-20-25» baǵdarlamasyn usynǵan edi. Atap aıtsaq, syıaqy mólsherlemesi - jyldyq 7%, bastapqy jarna - 20%, qaryz merzimi - 25 jylǵa deıingi talaptarmen ıpotekalyq qaryz berýdi kózdeıtin «7-20-25» baǵdarlamasyn iske qosý tapsyryldy. Baǵdarlamada Qazaqstan Respýblıkasynyń kez kelgen óńirinde bastapqy naryqta turǵyn úı satyp alý úshin Astana, Almaty, Aqtaý jáne Atyraý 25 mln teńge, al basqa óńirlerde - 15 mln teńge sheginde ıpotekalyq turǵyn úı qaryzyn alý múmkindigi qaralǵan.
Baǵdarlama kelesi bankter arqyly júzege asyrylady: «Bank TsentrKredıt», «ATF Bank», «Tsesnabank», «Qazaqstannyń turǵyn úı jınaq banki» , «Bank RBK» jáne «Qazaqstannyń Halyq banki».
Aıta ketý kerek, bıyl Pavlodar oblysynda 300 myń sharshy metr baspana paıdalanýǵa beriledi dep josparlanýda.
