Pavlodarda 6 mln kóshetke arnalǵan orman tálimbaǵy iske qosylady
PAVLODAR. KAZINFORM — Pavlodar oblysynda jylyna 6 mln danaǵa deıin kóshet ósiretin jańa orman tálimbaǵyn iske qosý josparlanyp otyr. Joba óńirdegi orman sharýashylyǵy mekemeleri men kógaldandyrý jumystarymen aınalysatyn kommýnaldyq qyzmetterdiń otyrǵyzý materıaldaryna degen qajettiligin óteýge múmkindik beredi.
Qazirgi tańda oblysta úsh orman tálimbaǵy jumys isteıdi. Alaıda óńirdegi orman sharýashylyǵy mekemelerinde tuqym men kóshet tapshylyǵy bar. Bul qajettilik ázirge syrttan jetkiziletin tuqym men kóshetter esebinen tolyqtyrylyp keledi.
Jańa tálimbaq Pavlodar aýdanynda salynbaqshy. Qazir jobaǵa qajetti jer ýchaskesin rásimdeý jumystary júrgizilip jatyr.
— Qazirgi ýaqytta Pavlodar aýdanynda atalǵan jobaǵa jer ýchaskesin rásimdeý boıynsha jumys istelip jatyr. Bul jabyq tamyr júıesi bar ósimdikter ósiriletin tálimbaq bolady. Jyl boıy óńirdegi úsh orman sharýashylyǵy mekemesi men kógaldandyrýmen aınalysatyn kommýnaldyq qyzmetterdiń qajettiligin óteýge múmkindik beredi, — dep habarlady Pavlodar oblysynyń jer qoınaýyn paıdalaný, qorshaǵan orta jáne sý resýrstary basqarmasynan.
Qazir jobanyń jobalyq-smetalyq qujattamasy ázirlenip jatyr. Tálimbaq memlekettik qoldaý tetikterin paıdalana otyryp, ınvestıtsııalar tartý arqyly salynady. Keıin nysan jergilikti atqarýshy organdardyń qaraýyna beriledi.
Óńirlik orman sharýashylyǵy jáne janýarlar dúnıesi aýmaqtyq ınspektsııasynyń málimetinshe, otyrǵyzylatyn kóshetterdiń jersiný kórsetkishi orta eseppen 70 paıyz shamasynda bolýy tıis. Sońǵy jyldardaǵy aýa raıynyń qolaısyzdyǵy men jaz mezgilindegi qýańshylyq kóshetterdiń jersinýine keri áser etip otyr. Máselen, 2025 jyldyń qorytyndysy boıynsha bul kórsetkish shamamen 40 paıyzdy quraǵan.
Eske sala keteıik, Ertis-Baıan óńirindegi ormandarda 3 mln kóshet otyrǵyzylady.
