Pavlodarda 64 jastaǵy áıel lıft shahtasyna qulap mert boldy
PAVLODAR. QazAqparat – Kópqabatty úıge jaqyn arada ǵana kóship kelgen úıdiń turǵyny osyndaı qaıǵyly jaǵdaıǵa ushyrady, dep habarlaıdy QazAqparat tilshisi.
«Jedel járdem stansasyna, 103 jelisine Bekturov, 109 mekenjaıyndaǵy lıft shahtasyna áıel adamnyń qulap ketkeni týraly qońyraý kelip túsken. Jedel túrde birinshi sanat boıynsha shokqa qarsy brıgada shyqty. Dárigerler kelgen kezde 1955 jyly týǵan áıel qaıtys bolyp ketken edi», - dep habarlady Pavlodar oblystyq densaýlyq saqtaý basqarmasynyń baspasóz qyzmeti.
Belgili bolǵandaı, áıel adam lıft shahtasyna qulap kóz jumǵan. Marqum bul úıge jaqynda ǵana kóship kelgen. Oblystyq densaýlyq saqtaý basqarmasynyń habarlaýynsha, jedel járdem brıgadasy oqıǵa ornyna sanaýly mınýttarda barǵan.
«Qońyraý 15:36-da túsken, oqıǵa ornyna 15:39-da jetken», - dep naqtylady basqarma.
Pavlodar oblysynyń polıtsııa departamenti oqıǵa ornynda tergeý jedel toby jumys istep jatqanyn atap ótti.
«Polıtseıler oqıǵa sebepterin anyqtap jatyr », - delingen vedomstvoda.
