Pavlodarda 600-ge jýyq nysannyń kóshe ataýynda 80 qate anyqtaldy
ASTANA. QazAqparat - Pavlodar qalalyq mádenıet jáne tilderdi damytý bólimi Chkalov kóshesimen qıylysatyn Suraǵanov kóshesiniń qate jazylǵan (Sýraǵanov) ataýyn jýyq arada túzetýge ýáde berdi. Bul týraly tilderdi damytý bóliminiń sektor meńgerýshisi Meıram Nuǵyman jýrnalısterge bergen suhbatynda málim etti, dep habarlaıdy QazAqparat pavlodarnews.kz saıtyna silteme jasap.
«Bizdiń sektor qala kóshelerindegi memlekettik tildiń saqtalýy men kórneki aqparattyń durys jazylýyn baqylaıdy. Onyń ishinde kóshe ataýlary jazylǵan taqtaıshalar da kiredi. Aı saıyn belgilengen kóshelerdi qaraımyz. Ókinishke oraı, mundaı qateler týraly jıi aıtylady. Turǵyndar telefon shalyp jatsa, sol jerge shyǵyp, sýretke túsirip alamyz. Eger de jekemenshik kásiporynǵa tıesili bolsa, túzetýin talap etemiz. Turǵyn úı bolsa, turǵyn úı kooperatıvi jáne páter ıeleri kooperatıvterimen jumys isteımiz. Osydan eki jyl buryn Suraǵanov kóshesi ashylǵanyn bilesizder. Sol kóshedegi ǵımarattar men jekemenshik mekemelerge, úkimettik emes uıymdarǵa, turǵyn úılerge bir tilde jáne belgilengen formatta taqtaıshalar shyǵardyq. Qalalyq ákimdiktiń tapsyrysy boıynsha TÚKSh bólimimen birge eskızin kelisip, tekserýden ótkizgennen keıin ornattyq. Al odan keıin salynǵan nemese qaıta qurý jumystaryn júrgizgen nysandar ózderi tapsyrys berip, qatelikke urynyp jatady. Bul jaǵdaıdy mindetti túrde qolǵa alyp, jóndeıtin bolamyz», - deıdi Meıram Nuǵyman.
Sektor meńgerýshisiniń aıtýynsha, bıyl jarnama jáne kórneki aqparat mátinderin qadaǵalaý boıynsha ótkizilgen monıtorıng barysynda jeti kóshede 580 nysan tekserilip, 80 qate anyqtalǵan. Onyń ishinde kóptegen jaǵdaıda qazaq tilindegi spetsıfıkalyq áripterdi jazý kezinde qatelikke jol beriledi.
«Barlyq qatelikter boıynsha «Qazaqstan Respýblıkasynyń til týraly» Zańyna sáıkes bolýy týraly nasyndardyń ıelerimen sóılesip, 60 hat jiberildi. Osynyń nátıjesinde zań buzýshylyqtar retke keltirildi. Sondaı-aq zań talaptaryn saqtaý maqsatynda shaǵyn jáne orta bıznes ókilderine tegin keńes beriletinin aıta ketken jón», - deıdi Meıram Nuǵyman.
