Pavlodarda 6-qabattan qulaǵan qyzdyń ómirine qaýip tónip turǵan joq - dáriger
PAVLODAR. QazAqparat - Pavlodarda 5 jasar qyz altynshy qabattyń terezesinen qulap, ony kezdeısoq jolda ketip bara jatqan adam qutqaryp qalǵan, dep habarlaıdy QazAqparat.
«Onyń ómirine eshqandaı qaýip tónip turǵan joq, qosymsha tekserýler, dıagnostıkalyq sharalar júrip jatyr. Onyń janynda kómektesetin adamnyń der kezinde bolýy, ýaqtyly alǵashqy kómek kórsetýi jáne «jedel járdemdi» tez arada shaqyrýy úlken ról oınady», - dep málimdedi Pavlodar oblystyq balalar aýrýhanasynyń ordınator dárigeri Talǵat Qasymbekov jýrnalısterge.
Pavlodar oblystyq balalar aýrýhanasyna bes jasar qyz 20 qazan kúni keshki saǵat altylar shamasynda túsken. Onyń jabyq túrde mı zaqymdalyp, túrli dene jaraqattaryn alǵan.
Qazir búldirshin travmatologııa bóliminde jatyr, jaǵdaıy ortasha aýyr. Ol adamdarmen sóılesip jatyr.
Qaıǵyly oqıǵa bir kún buryn bolǵan. Qyz altynshy qabattan qulap, aman qalǵan. Ony jolda ketip bara jatqan er adam qutaqryp qalyp, alǵashqy medıtsınalyq kómek kórsetken jáne jedel járdem shaqyrǵan. Pavlodarlyq Aleksandr Jumabaev qulap bara jatqan qyzdy qolymen qaǵyp almaqshy bolǵan. Biraq, júgirip úlgermegen. Bala butanyń arasyna qulaǵan.
«Men qyzdy ajal qushty dep oıladym. Ózim qorqyp kettim. Baryp qarasam, tynys ala almaı jatyr eken. Ony qozǵap edim, demala bastady. Oǵan jasandy tynys berý kerektigi oıyma oraldy», - dep eske aldy ol.
Aleksandrdyń aıtýynsha, bala kúninde oǵan qatty qulaǵannan keıin jasandy tynys bergen. Ol qalaı jasaý kerektigin esine saqtap qalǵan. Sondyqtan, bul jaǵdaıda ony jasaý kerektigi jyldam oıyna oralyp, sodan keıin qyz tynys alyp, aıqaılaǵan.
