Pavlodarda 6 bala tamaqtan ýlanyp qaldy
PAVLODAR. QazAqparat - Pavlodar qalasyna qarasty Pavlodar aýylynyń mektebindegi ashanada tamaqtanǵan 6 bala ýlanyp qaldy, dep habarlaıdy pavlodarnews.kz.
Bul týraly oblystyq bilim berý basqarmasynyń basshysy Dinıslam Bolathanuly óziniń facebook jelisindegi paraqshasynda jazdy. - Birden aıta keteıin, jaǵdaı meniń jeke baqylaýymda. Oqıǵanyń mán-jaıy anyqtalatyn bolady»,- dep jazdy Dinıslam Bolathanuly.
Qazir oqıǵa ornynda Pavlodar bilim berý bóliminiń jáne qoǵamdyq densaýlyqty baqylaý organynyń ókilderi jumys jasaýda. Jaqyn arada tekserý nátıjeleri daıyn bolady. Basqarma basshysy balalardyń ata-anasynan keshirim surady. - Bilim ordasyndaǵy oqıǵa bizdiń kinámizden oryn almasa da, jaýapkershilikti sezinip, densaýlyqtaryna qaýip tóngen balalardyń ata-anasynan úlken keshirim suraımyn. Qazirgi ýaqytta bes bala emhanada, bir bala úıinde em qabyldaýda. Dárigerler balalardyń jaǵdaıy qanaǵattanarlyqtaı ekendigin habarlady. Taǵy da atap óteıin, balalardyń densaýlyǵy – eń mańyzdysy! Olardyń tezirek jazylyp ketýin tileımiz»,- dep atap ótken oblystyq bilim berý basqarmasynyń basshysy.
Dinıslam Bolathanulynyń aıtýynsha, jaǵdaı anyqtalýda. Ashanany jalǵa alýshynyń áreketi tekserilip jatyr. Sheshim sanepıdemıologtardyń resmı qorytyndysynan keıin shyǵady.