Pavlodarda 52 mln teńgeniń kontrafakti ónimi joıyldy
PAVLODAR. KAZINFORM - Pavlodar oblysynda segiz qylmystyq is boıynsha zattaı dálel retinde tirkelgen, jalpy quny 52 mln teńgeden asatyn taýar joıyldy.
Óńirlik ekonomıkalyq tergep-tekserý departamentiniń málimetinshe, joıylǵan ónimderdiń qatarynda 390 veıp, aktsızdik markasyz 13 myńnan astam qorap temeki jáne 356 bótelke sýrrogat alkogol bar.
Vedomstvo ókilderiniń aıtýynsha, qylmystyq ister boıynsha zattaı dálelderdi joıý - zańnamada kózdelgen standartty rásim. Mundaı sharalar keıde qoǵam ókilderi men kolledj stýdentteriniń qatysýymen ashyq túrde ótkiziledi.
Departament basshysynyń orynbasary Ǵalıasqar Qasymov zańsyz aınalymdaǵy ónimderdiń adam densaýlyǵyna qaýip tóndiretinin atap ótti.
- Bizdiń azamattar mundaı ónimderdi satyp alyp, keıin ýlanyp nemese túrli aýyr aýrýlarǵa shaldyǵýy múmkin. Tipti ólimge ákeletin jaǵdaılar da bar. Óıtkeni bul ónimderdiń, sonyń ishinde alkogoldiń de quramynda tehnıkalyq spırt bolady. Ony sýmen aralastyryp, bótelkelerge quıyp, halyqqa satady, - dedi Ǵalıasqar Qasymov.
Eske sala keteıik, Shymkentte kontrafaktilik qurylys qospalaryn shyǵaratyn astyrtyn tsehtyń jumysy toqtatyldy.
