Pavlodarda 468 kópqabatty úı jylý maýsymyna daıyn
PAVLODAR. KAZINFORM – Búginde oblys ortalyǵynda 1 300 kópqabatty baspana bar. Ótken jylmen salystyrǵanda bıyl qysqa erte qamdanǵan úılerdiń sany kóp.
Pavlodar qalasyndaǵy 1 300 kópqabatty úıdiń 468-i qysqy jylytý kezeńine 100% daıyn. Bul týraly qalalyq turǵyn úı ınspektsııasy jáne kommýnaldyq sharýashylyq bóliminen habarlandy.
«2024-2025 jylytý maýsymyna 100% daıyndyǵy bar úılerdiń sany – 468. Úılerińizdi jylytý maýsymyna daıyndyq barysy týraly aqparatty qyzmet kórsetetin uıymdardan tekserińizder. Úılerge qyzmet kórsetýshi uıymdar ishki jylý jelilerinde gıdravlıkalyq synaýlar júrgizip, sý jylytqyshtardy, jylý júıeleriniń jaǵdaıyn tekserip jatyr. Buǵan qosa qubyrlardy shaıyp, drosselder qurylǵylaryn ornatady», - dep málimdedi mekemeden.
Eske sala keteıik, QR Úkimeti Pavlodar, Ekibastuz jáne Aqsý qalalarynda jylý jelilerin salýǵa 9 mlrd teńge bóldi.
