Pavlodarda 40 mln teńge shyǵyn keltirgen bir top mal urysy ustaldy

PAVLODAR. KAZINFORM — Urylar maldy jaıylymda soıyp, etke ótkizip kelgen. Qazirgi ýaqytta kúdiktilerge qatysty sotqa deıingi tergep-tekserý júrgizilip jatyr.

Polıtsııanyń jedel qyzmetkerleri mar urlyǵymen aınalysyp kelgen 9 kúdiktini qolǵa túsirdi. Olardyń tórteýi qamaýǵa alyndy. Urylar qylmystyq top qurǵan. 

— Aldyn ala málimet boıynsha, ótken kúzde kúdiktiler jaıylymdardan mal urlaǵan. Keıin maldy soıyp, etin ótkizgen. Keltirilgen materıaldyq shyǵyn 40 mıllıon teńgeden asty. Sonymen qatar olardyń osyǵan uqsas ózge de qylmystarǵa qatysy tekserilýde. Sotqa deıingi tergep-tekserý jalǵasýda, — dep habarlady Pavlodar oblysy polıtsııa departamenti krımınaldyq polıtsııa basqarmasynyń bastyǵy Jasulan Tanjanov.

Budan bólek, polıtsııa veterınarııalyq qyzmetpen birlesip, mal men et ónimderin tasymaldaý boıynsha turaqty túrde tekserý jumystaryn júrgizip keledi. Mamandar jaıylymdardy jáne qaraýsyz júrgen maldy, sondaı-aq saýda núktelerin, bazarlardy, soıý pýnktterin mal men et ónimderin tasymaldaıtyn kólikterdi tekserip jatyr.

Eske sala keteıik, Pavlodarda urylar bir jylda 163 mln teńgeniń múlkin qoldy etken.