Pavlodarda 40-tan astam memlekettik qyzmetshi jumys ýaqytynan tys eńbekke tartylyp kelgen

PAVLODAR. KAZINFORM — QR Memlekettik qyzmet isteri agenttiginiń Pavlodar oblysy boıynsha departamenti 42 memlekettik qyzmetshiniń zańdy quqyqtaryn qorǵady.

Óńirlik memlekettik qyzmet isteri jónindegi departament mamandary oblystaǵy memlekettik mekemelerdi tekserip, jumys ýaqyttarynan tys eńbekke tartylǵan qyzmetshilerdi anyqtaǵan. Mundaı tekseris jyldyń alǵashqy úsh aıynda júrgizilgen.

— Memlekettik organdarda jumys isteıtin 42 memlekettik qyzmetshiniń zańdy quqyqtary qalpyna keltirildi. Olarǵa jumys merziminen tys eńbek etkeni úshin demalys saǵattary berildi. Jeti aýyldyq okrýg ákimi jáne aýdandyq ákimdikterdegi bólim basshylary QR Ákimshilik quqyq buzýshylyq týraly kodeksiniń 89-baby (Jumys ýaqytynyń normasyn zańsyz asyrý) boıynsha ákimshilik jaýapkershilikke tartyldy, - dep habarlady departamentten.

Monıtorıng barysynda 36 sheneýnik issapar shyǵyndary boıynsha jalpy somasy 3,7 mln teńge almaǵany da belgili bolǵan. Olardyń shyǵyndary tolyqtaı jabyldy.

Eske sala keteıik, Pavlodarda jetim balaǵa bólingen páterde aýdan ákiminiń orynbasary turyp kelgen.