Pavlodarda 40 mln teńge jymqyrǵan «Shańyraq» mádenı ortalyǵynyń basshysy sottaldy

NUR-SULTAN. QazAqparat – Bıýdjetten 40 mln teńge jymqyrdy dep aıyptalǵan Pavodar qalasyndaǵy «Shańyraq» halyq shyǵarmashylyǵy jáne mádenı-demalys qyzmeti ortalyǵynyń basshysy sottaldy, dep habarlaıdy QazAqparat tilshisi.

Bul týraly QR Sybaılas jemqorlyqqa qarsy is-qımyl agenttiginiń asa mańyzdy ister jónindegi tergeýshisi Qaısar Barjaqsynov Antikor aqparat alańynda málim etti.

«21 qyrkúıekte Pavlodar qalasynyń №2 sotynyń úkimimen oblystyq «Shańyraq» halyq shyǵarmashylyǵy jáne mádenı-demalys qyzmeti ortalyǵynyń basshysy Aıapbergenova 7 jylǵa bas bostandyǵynan aıyryldy» dedi agenttik tergeýshisi.

Osy úkimmen «Shańyraq» ortalyǵynyń kassıri Ábishaeva da 7 jyl merzimge bas bostandyǵynan aıyrylypty.

«Atalǵan tulǵalar ártisterdiń qyzmetter kórsetýi týraly kórineý jalǵan sharttar jasaý arqyly 2017 jyldan bastap 2019 jylǵa deıingi kezeńde 40 mln teńge somasynda bıýdjet qarajatyn jymqyrdy dep kúdiktengen. Aıapbergenova ómir boıy memlekettik qyzmette qyzmet atqarý quqyǵynan aıyryldy, Ábishaeva materıaldyq jaýapkershilikke baılanysty qyzmetpen 10 jyl merzimge aınalysý quqyǵynan aıyryldy. Úkim zańdy kúshine engen joq», - dedi QR Sybaılas jemqorlyqqa qarsy is-qımyl agenttiginiń asa mańyzdy ister jónindegi tergeýshisi Qaısar Barjaqsynov.