Pavlodarda 34 mln teńgege jóndelip, qaıtadan sýǵa batyp ketken kópir áli kúnge paıdalanylmaı tur
PAVLODAR. KAZINFORM - Aqsýǵa qarasty tórt aýyldyń halqyn shabyndyq jermen baılanystyratyn ponton kópir bıyl kóktemde qırap, jergilikti bılik nysan 25 shildege deıin qaıtadan jóndeledi dep ýáde etken bolatyn.
Áleýmettik jelide Kóktas aýyly mańynda búlingen ponton kópirdiń áli kúnge jóndelmeı, sýda jatqany týraly beınejazba tarady. Uzyndyǵy 66 metr, eni 7 metr ponton kópiri 2006 jyldan beri paıdalanylyp keledi.
34 mln teńgege jóndelgen ponton kópir bıyl kóktemde taǵy da sýǵa batyp ketkenin jazǵanbyz.
Belgili bolǵandaı, kópirdi paıdalaný barysynda birqatar tehnıkalyq aqaý anyqtalǵan. Atap aıtqanda, dánekerlengen tigisterdiń ajyraýy jáne ponton konstrýktsııalarynyń tozýy baıqalǵan. Keıin kóktemgi mezgilde ózenniń tasýy saldarynan kópir sýǵa batyp, jaramsyz bolyp qalǵan.
Sol ýaqytta Aqsý qalasynyń ákimdigi merdiger fırma «StroıEtalon» JShS kópirdi qalpyna keltirý jumystaryn bıylǵy 25 shildege deıin júrgizedi dep ýáde etken bolatyn.
Alaıda is júzinde aýyl halqyn Belaıa ózeniniń arǵy jaǵyna ótkizetin ponton qıraǵan kúıinde áli kúnge teńkıip jatyr. Al shabyndyq mezgili kelip qalǵan.
Aqsý qalasynyń ákimdigi ponton kópirdiń ýádeli merzimde ne sebepti jóndelmeı qalǵanyn bylaı túsindirdi:
- Qazirgi ýaqytta Aqsý qalasynyń ákimdigi múddeli taraptarmen birlesip, Abaı oblysynda ornalasqan ponton kópir ótkelin satyp alý jumystaryn júrgizýde. Qurylymnyń gabarıttik ólshemderiniń úlken bolýyna baılanysty ony avtomobıl kóligimen tasymaldaý tehnıkalyq turǵydan múmkin emes. Osyǵan baılanysty ponton kópir ótkelin Ertis ózeni arqyly súıretkish kemeniń kómegimen jetkizý eń ońtaıly tásil retinde qarastyrylýda, - dep habarlady qalalyq ákimdikten.
Sheneýnikter pontondy Kóktas aýylyna deıin súıretip jetkizýge baılanysty uıymdastyrýshylyq jáne tehnıkalyq máseleler qosymsha pysyqtalyp jatqanyn aıtady.
Barlyq qajetti rásimder aıaqtalyp, túpkilikti sheshim qabyldanǵannan keıin bul týraly aqparat belgilengen tártippen jurtshylyqqa jetkiziletin bolady.
Kóktas aýylyndaǵy atalǵan ponton kópir 2024 jyly da ózenge batyp ketken bolatyn.
