Pavlodarda 34 mln teńgege jóndelgen ponton kópir taǵy da sýǵa batyp ketti
PAVLODAR. KAZINFORM - Belaıa ózeniniń ústinen salynǵan ponton kópirdi Aqsý aýyldyq aımaǵynyń 4 aýyly paıdalanyp otyr. Turǵyndar ol arqyly ózenniń kelesi betindegi shabyndyqqa ótip, mal azyǵyn daıyndap kelgen.
Áleýmettik jelide Aqsý qalasy Kóktas aýylynda byltyr ǵana jóndelgen kópirdiń sýǵa batyp ketkeni týraly vıdeo paıda boldy.
Vıdeo avtorlary jergilikti bılik eshqandaı áreketsiz otyr dep shaǵymdanǵan.
- Kópirimiz bıyl sý tasyǵan ýaqytta ózenge batyp ketti. Byltyr ǵana jóndelgen edi. Endi mine, taǵy isten shyqty. Ol arqyly ózenniń arǵy betindegi shabyndyqqa shyǵamyz. Bıyl qysqa mal azyǵyn qalaı daıyndaıtynymyzdy bilmeımiz. Jalǵyz ótkelimiz bolǵanyna qaramastan ákimimiz eshqandaı áreket jasamaı otyr, - dep muńyn shaǵady beınejazbany túsirýshi áıel adam.
Anyqtaǵanymyzdaı, Kóktas aýylyndaǵy uzyndyǵy 66 metr, eni 7 metr ponton kópiri 2006 jyldan beri paıdalanylyp keledi.
- Atalǵan kópir turǵyndardyń Belaıa ózeniniń arǵy jaǵynda ornalasqan shabyndyq jerlerine ótip, mal azyǵyn daıyndaý úshin paıdalanylady. Sonymen qatar joǵary kerneýli elektr jelilerine qyzmet kórsetetin «KEGOC» AQ mamandary da kópirdi qyzmettik maqsatta qoldanady. Kópirdi tórt aýyldyń turǵyndary paıdalanyp otyr. 2025 jyly merdiger uıym – «StroıEtalon» JShS tarapynan ponton kópirine aǵymdaǵy jóndeý jumystary júrgizildi. Jóndeý jumystaryna bıýdjetten 34 mln teńge qarajat jumsaldy, - dep habarlady Kazinform tilshisine Aqsý qalalyq ákimdiginen.
Bıyl sáýir aıynda kópirdi paıdalaný barysynda birqatar tehnıkalyq aqaý anyqtalǵan. Atap aıtqanda, dánekerlengen tigisterdiń ajyraýy jáne ponton konstrýktsııalarynyń tozýy baıqalǵan. Keıin kóktemgi mezgilde ózenniń tasýy saldarynan kópir sýǵa batyp, jaramsyz bolyp qalǵan.
- Anyqtalǵan aqaýlarǵa baılanysty aýyldyq okrýg ákimdigi merdiger uıymdy kepildik mindettemelerin oryndaýǵa mindetteý týraly sotqa talap aryz joldady. Іsti qaraý qorytyndysy boıynsha taraptar medıatıvtik kelisimge keldi. ıAǵnı «StroıEtalon» JShS kópirdi qalpyna keltirý jumystaryn bıylǵy 25 shildege deıin oryndaýǵa mindettendi, - dep qosty ákimdikten.
Bılik ókilderi kópirdi jóndeýge bıýdjetten qosymsha qarajat bólý máselesi qarastyrylmaıtynyn, jumystar merdiger uıymnyń kepildik mindettemeleri aıasynda júzege asyrylatynyn naqtylady.
Kóktas aýylyndaǵy atalǵan ponton kópir 2024 jyly da ózenge batyp ketken bolatyn.
