Pavlodarda 32 jastaǵy er adam aǵaıyndy eki balany soqqyǵa jyqty
PAVLODAR. QazAqparat - Jaraqat alǵan segiz jáne toǵyz jastaǵy ul balalar aýrýhanaǵa jatqyzyldy, dep habarlaıdy pavlodarnews.kz.
Oqıǵa týraly agenttik áleýmettik jelilerden habardar boldy. Facebook paıdalanýshysy Anton Chashın oqıǵa senbi kúni Ekinshi Pavlodar aýdanynda, balalar alańynda bolǵanyn jazady. Pavlodarlyqtardyń boljamynsha, «qańǵybas kishkentaı balalardy káriz kollektoryna súıregen. Dál sol kezde qańǵybasta epılepsııa belgileri bastalyp, balalar qashyp ketken». Facebook paıdalanýshysy bolǵan oqıǵa týraly Ekinshi Pavlodar turǵyndarynan bilgenin aıtady.
Pavlodar oblysynyń polıtsııa departamenti oqıǵa senbi kúni oryn alǵanyn rastady, alaıda tergeý múddesi úshin málimetter jarııalanbaıdy.
«16 naýryz kúni saǵat 23:00-de polıtsııaǵa Mının kóshesindegi úıdiń janynda belgisiz adam buzaqylyq nıetpen kámeletke tolmaǵandarǵa dene jaraqatyn keltirgeni týraly habarlama túsken. Bul fakti polıtsııada tirkelgen. Polıtsııa qyzmetkerleri Pavlodar qalasynyń 32 jastaǵy turǵynyn anyqtap, ustady. Atalǵan faktige qatysty QR QK 293-baby boıynsha sotqa deıingi tergeý júrgizilýde, oqıǵanyń mán-jaıy men sebepteri anyqtalýda. Nátıjesi shyqqan soń túpkilikti protsessýaldyq sheshim qabyldanady», - dep habarlady departament agenttiktiń resmı suraýyna bergen jaýabynda.
Óńirlik densaýlyq saqtaý basqarmasynyń baspasóz qyzmeti 2009 jáne 2010 jyldary týǵan balalardyń jaraqattanǵanyn rastady.
«16 naýryz kúni saǵat 18:20-da jedel járdemge shaqyrý kelip tústi. Eki ul balada jabyq bas súıek-mı jaraqaty, mıdyń shaıqalýy, kóptegen gematomalar, bas pen bettiń shash bóliginiń jarylýy, sondaı-aq jumsaq tinderdiń zaqymdanýy anyqtaldy. Qazirgi ýaqytta patsıentterdiń jaǵdaıy ortasha aýyr, ıaǵnı balalar qatty qorqyp qalǵan. Ul balalar aýrýhanaǵa jatqyzylyp, barlyq qajetti emdi alyp jatyr», - dep túsindirdi densaýlyq saqtaý basqarmasynyń baspasóz hatshysy Elmıra Temirǵalıeva.
Illıýstratsııalyq foto
