Pavlodarda 300-ge jýyq júrgizýshi kýáliginen aıyryldy

PAVLODAR. KAZINFORM — Kólikterdiń qarsy jolaqqa shyǵýy jol-kólik oqıǵasynda jıi tirkeletin derekterdiń biri.

Mundaı zań buzýshylyq úshin júrgizýshi 6 aı merzimge kólik quralyn júrgizý quqyǵynan aıyrylatynyn aıtý kerek.

Polıtseılerdiń sózinshe, júrgizýshiler manevr jasaýǵa tyıym salatyn jolaqty nemese belgini baıqamaı, zań buzýshylyqqa jol beredi. Osylaısha jol qozǵalysynyń ózge qatysýshylaryna da qaýip tóndiredi.

— Jyl basynan beri 286-daı júrgizýshi jaýapkershilikke tartylyp, júrgizýshi kýáliginen aıyryldy. Mysaly, oblys ortalyǵynda Kataev-Estaı kósheleriniń qıylysynda Toyota Corolla avtomashınasynyń júrgizýshisi tórt jolaǵy bar ekijaqty qozǵalystaǵy joldyń qarsy betine shyqty. Júrgizýshi jaýapqa tartyldy, sheshim qabyldaý úshin materıal sotqa jiberildi, — dep habarlady Pavlodar oblysynyń polıtsııa departamentiniń baspasóz qyzmetinen.

Eske sala keteıik, Pavlodarda apattyq jaǵdaı týǵyzǵan 500-den astam júrgizýshi jazalandy.