Pavlodarda 300-ge jýyq otbasy baspanaly boldy
PAVLODAR. KAZINFORM - Kópqabatty turǵyn úıdegi jańa páterlerge jetim balalar, kóp balaly otbasylar jáne áleýmettik osal otbasylar sanatyndaǵy azamattar qonystandy. Búginde áleýmettik turǵyn úı kezeginde 16 myńnan astam pavlodarlyq tur.
Pavlodarda baspana úı kezeginde turǵan 288 adamǵa jalǵa beriletin páter kiltteri tabystaldy. Ladojskaıa kóshesi, 17 mekenjaıy boıynsha boı kótergen turǵyn úıge jetim balalar, kóp balaly otbasylar jáne áleýmettik osal otbasylar sanatyndaǵy azamattar qonystandy.
Oblys ákimi Asaıyn Baıhanov qonys ıelerin quttyqtady.
- Osy jyldyń naýryz aıynda kezekte turǵandardyń úsh sanatyna 210 páter berdik. Al, búgin kópten kútken páter kiltterin Pavlodardyń úı kezeginde turǵan 288 janǵa tabystaǵanyma óte qýanyshtymyn. Keıbirińiz úshin bul kúndi uzaq jyl kútýge týra kelgenin bilemin. Oblys basshylyǵy atynan uzaq kúttirgenimiz úshin keshirim suraımyn jáne túsinistik tanytyp, shydamdylyq tanyta bilgenderińiz úshin alǵysymdy bildiremin. Bıyl taǵy 250 páter tapsyratyn bolamyz. Biraq olar «Shańyraq» jáne «Baqytty otbasy» memlekettik baǵdarlamalary aıasynda áleýmettik-nesıelik turǵyn úı baǵyty boıynsha beriledi, - dedi óńir basshysy.
A.Baıhanov «Dostyq» shaǵyn aýdanynyń qurylysy jalǵasatynyn atap ótti. «Jaıly mektep» baǵdarlamasy aıasynda zamanǵa saı bilim uıasy salynýda, balabaqsha, emhana, muz arenasy, kontsert zaly, meshit salý josparlanǵan. Qalalyq qoǵamdyq kólik qozǵalysy, onyń ishinde tramvaı baǵyttarynyń jelileri uzartylatyn bolady.
Áleýmettik baspanaǵa ıe bolǵandardyń biri - Mońǵolııanyń týmasy, qandas Janat Daýan. Ol jubaıy Maǵrıpa Kankóneımen birge 8 bala tárbıelep otyr.
- 2006 jyly Qazaqstanǵa kóship kelip, Moıyldy aýylynda turdyq. Turǵyn úı kezeginde shamamen 17 jyl turdym jáne eshqashan úmitimdi úzgen emespin. Men memleketke óte rızamyn, bul bizdiń kópten kútken qýanyshymyz, - dep qýanyshymen bólisti kópbalaly otbasynyń otaǵasy.
Eske sala keteıik, Pavlodar oblysynda 815 otbasy qundy qaǵazdar esebinen baspanamen qamtylady.
