Pavlodarda 300-den astam er adam alıment tóleýden jaltaryp júr

PAVLODAR. KAZINFORM - Ertis-Baıan óńirinde 326 áke balasyna alıment tólemeı qashyp júr. Polıtsııa qyzmetkerleri sot oryndaýshylarymen birge olardy anyqtaý maqsatynda arnaıy reıdtik shara uıymdastyrdy.

Pavlodar oblysynda alıment tóleýden jaltaryp júrgen ákelerdiń sany azaıar emes. Polıtsııa olardy anyqtaý boıynsha turaqty reıdterdi uıymdastyrady.

- Máselen oblys ortalyǵynyń turǵyny alıment tóleý boıynsha sot sheshimin oryndamaǵan. Onyń óz balasynyń aldyndaǵy bereshegi 1 mln teńgeden asady. Qabyldanǵan sharalarmen 36 jastaǵy er adam ustaldy. Zańnamaǵa sáıkes sot oryndaýshy mindetti túrde alıment tóleýshimen jumys isteýi kerek. Eger de boryshker zań ókilderiniń eskertýlerin elemeı, alıment tóleýden qashsa, onyń ústinen qylmystyq is qozǵalady, - deıdi óńirlik polıtsııa departamenti aqparattyq saıasat bóliminiń aǵa ınspektory Quralaı Muǵadilova.

Polıtsııa qyzmetkerleri jaýapsyz ákelerdi anyqtap, quzyrly mekeme qyzmetkerlerine jiberip jatyr.

Eske sala keteıik, prokýratýra jyl basynan beri alımentten qaǵylǵan 250 balanyń paıdasyna 87 mln teńge óndirgen.