Pavlodarda 30 oqýshy halyqaralyq olımpıadalardyń júldegeri atanǵan
PAVLODAR. KAZINFORM - Ertis-Baıan óńiriniń bilim salasynda 20 myńnan astam pedagog qyzmet etedi. 2023-2024 oqý jylynda 30 oqýshy halyqaralyq olımpıadalardyń júldegeri atanǵan.
Pavlodar oblysynda 360 jalpy bilim berý mektebi jumys isteıdi. Onyń ishinde 137-si qazaq tilinde oqytatyn mektep. Olarda jalpy sany 118 myńdaı oqýshy oqysa, 50 myńnan astamy nemese 43 paıyzy ǵana qazaq tilinde bilim alady. Bıyl 11 myńǵa jýyq bala birinshi synypqa bardy,
Byltyrǵy oqý jylynda ustazdarynyń daıyndaýymen 30 oqýshy halyqaralyq olımpıadalarda júldege ıe bolǵan. Oblystyq №8 lıtseı «Qazaqstan Respýblıkasynyń úzdik olımpıadalyq komandasy» ataǵyn jyl saıyn dáleldep keledi. Lıtseıdi daryndy oqýshysy Rınat Eleýsizov hımııa boıynsha halyqaralyq Mendeleev olımpıadasynyń jáne Shanchjende álemniń 29 elinen kelgen oqýshylar arasyndaǵy olımpıadanyń altyn medal ıegeri, Saýd Arabııasynda ótken 56 halyqaralyq hımııa olımpıadasynyń (IChO) jeńimpazy. Olardy hımııa pániniń muǵalimi Oksana Vladımırovna Koldasheva daıyndady. Taǵy biri – mekteptiń ótken jylǵy túlegi, «Jibek joly» XXIII halyqaralyq matematıkalyq olımpıadanyń altyn medal ıegeri, Azııa-Tynyq muhıty, Jáýtikov, Balqan álemdik olımpıadalarynyń, Japonııadaǵy halyqaralyq olımpıadanyń júldegeri Vladımır Rogovskıı.
Bıyl Pavlodar servıs jáne tamaqtaný kolledjiniń stýdenti Leıman Artýr «Meıramhana servısi» sanatynda «WorldSkills Lion - 2024» álem chempıonatynyń «Best of nation» nomınatsııasyn jeńip aldy. Jas talantty servıs jáne tamaqtaný kolledjiniń óndiristik oqytý sheberi Almıra Sadrıdenova daıyndady.
Jýyqta daryndy oqýshylar men olardyń ustazdaryna Pavlodar oblysynyń ákimi Asaıyn Baıhanov Qurmet gramotalary men aqshalaı sertıfıkattar tabys etti.
Buǵan deıin Pavlodar oblysynda qazaq synybynan jeringen ata-ana kóp ekenin jazǵan edik.
