Pavlodarda 28 aýyl ortalyqtandyrylǵan aýyzsý qubyryna qosyla almaı otyr
PAVLODAR. KAZINFORM - Buǵan eldi mekenderdegi halyq sanynyń 500 adamnan tómen bolýy sebep. Aımaqta halyqty taza aýyzsýmen qamtý kórsetkishi 92 paıyzdy qurap otyr.
Óńirde jalpy sany 352 eldi meken bar bolsa, sonyń 224-i ortalyqtandyrylǵan taza aýyz sýǵa qosylǵan. Ózge eldi mekender tirshilik nárin tasyp ishýge májbúr. Al bolashaǵy joq 28 aýylǵa aýyzsý qubyryn tarý múldem qarastyrylmaǵan. Buǵan halyq sanynyń 500 adamnan kem bolýy sebep.
Bıyl 16 aýylǵa sý qubyry tartylatyn bolady. Buǵan 2,2 mlrd teńge bólingen. Nátıjesinde óńirdegi sýmen qamtý kórsetkishi 99,3 paıyzǵa jetedi dep josparlanǵan.
- Qala halqyn sýmen qamtý 97 paıyzdy quraıdy. Bıyl 5,3 mlrd teńgege 6 joba iske asyrylatyn bolady. Sý qubyryn tartý jumystary aıaqtalǵanda,aýyzsýmen qamtý 98 paıyzǵa jetedi. Al shahar halqyn 100 paıyz taza aýyz sýmen qamtý úshin 10 jobanyń qujaty daıyndalyp jatyr. Bul Ekinshi Pavlodar, Saıajaı, Lesozaýyt aýmaǵyndaǵy úılerge qatysty. Qazir barlyq jobanyń egjeı-tegjeıli jospary pysyqtalyp jatyr. Memlekettik saraptamadan ótkennen keıin jobaǵa qarajat suraý úshin mınıstrlikke qujattar jiberiletin bolady, - deıdi Pavlodar oblysy energetıka jáne turǵyn úı-kommýnaldyq sharýashylyǵy basqarmasy basshysynyń mindetin atqarýshy Kúlbarshyn Arynova.
Eske sala keteıik, Pavlodardyń 8 aımaǵynda aýyzsý sapasy normatıvke saı kelmeıdi.
