Pavlodarda 27 jastaǵy jigitten tórt kúnnen beri habar joq
PAVLODAR. QazAqparat - Pavlodar turǵyny 4 kúnnen beri tabylmaı jatyr, dep habarlaıdy QazAqparat.
Oblystyq polıtsııa departamentiniń málimetinshe, 30 sáýir kúni Tereńkól aýdany polıtsııa bólimine jergilikti turǵyn júgingen.
Aıtýynsha, 27 jastaǵy uly Darhan Baıtok túngi úshten beri habarsyz.
Polıtsııa qyzmetkerleri jedel-tergeý tobyn quryp, óńirdegi búkil aýmaqtyq bólimshelerge, sondaı-aq oblystardyń polıtsııa departamentterine habar berdi.
– Birinshi kúnnen bastap joǵalǵan adamdy tabý úshin izdestirý sharalary júrip jatyr. Iesiz úıler, elsiz jerler, sý aıdyndary, qamys qopalary, shalǵyndar, saı-shuńqyrlar, aýyl shetindegi jerler, qaraýsyz qalǵan qurylystar, pishen saraılary qaralǵan. Dalaly jerlerdi sholýǵa kvadrakopter qoldanyldy. Polıtsııada profılaktıkalyq esepte turǵan adamdardyń turatyn jeri tekseriledi. Bul jumysqa eriktiler men janashyr azamattar, aýyl turǵyndary qosyldy. Іzdeý jumystary jalǵasyp jatyr, - dep atap ótti polıtsııa.
Darhan Baıtoq týraly qandaı da bir aqparat biletin jan bolsa, 102 telefonyna nemese «Police 102» mobıldi qosymshasyn paıdalanyp habar bere alady.